Իտալացի դաշնակահար Անտոնիո Կոնսալեսն առաջին անգամ համերգ կունենա Երևանում փետրվարի 5–ին

ԵՐԵՎԱՆ, 4 փետրվարի. /Նովոստի–Արմենիա/. Իտալացի դաշնակահար Անտոնիո Կոնսալեսն առաջին անգամ համերգ կունենա փետրվարի 5–ին Հայաստանի Սպենդիարյանի անվան օպերայի և բալետի ազգային ակադեմիական թատրոնում։

«Ես առաջին անգամ եմ Հայաստանում և շատ ուրախ եմ։ Թեև ֆիլհարմոնիկ նվագախմբի հետ դեռ անցյալ տարի պիտի նվագեի, սակայն մայրս մահացավ, և այդ պատճառով նախորդ տարվա մայիսին չկարողացա գալ Հայաստան»,– չորեքշաբթի լրագրողներին ասաց Կոնսալեսը։

Կոնսալեսը ելույթ կունենա Հայաստանի ազգային ֆիլհարմոնիկ նվագախմբի հետ` Կարեն Դուրգարյանի ղեկավարությամբ։ Երաժիշտները կկատարեն Ռախմանինովի թիվ 2 դաշնամուրի կոնցերտը՝ գրված դաշնամուրի և նվագախմբի համար:

Դաշնակահարը նշում է, որ 2015 թվականը շատ կարևոր տարի է, քանի որ հենց այս տարի է Հայաստանում նշվում Հայոց ցեղասպանության 100–ամյա տարելիցը։

«Հայ երաժշտության մեջ ես կարող եմ առանձնացնել Արամ Խաչատրյանի ստեղծագործությունները, որոնք պաշտում եմ։ Իտալական կոնսերվատորիայում էլ են Խաչատրյան նվագում»,– ասաց Կոնսալեսը` ավելացնելով, որ փոքր տարիքում ինքը նույնպես նվագել է հայ մեծ կոմպոզիտորի ստեղծագործությունները։

Կոնսալեսը նաև վարպետության դաս կանցկացնի Երևանի Չայկովսկու անվան երաժշտական հատուկ դպրոցում փետրվարի 6–ին և 7–ին։

Համերգի հովանավորը Թուֆենկյան հիմնադրամն է։ -0-