Հայտնի կոմպոզիտոր և դաշնակահար Ալեքսեյ Կուրբատովը վարպետության դաս է անցկացրել Երևանում

ԵՐԵՎԱՆ, 29 հունվարի. /Նովոստի–Արմենիա/. Ռուս երիտասարդ հայտնի կոմպոզիտոր և դաշնակահար Ալեքսեյ Կուրբատովը հինգշաբթի վարպետության դաս է տվել Երևանի 13–րդ հատուկ երաժշտական դպրոցի սաներին։

«Շատ եմ սիրում այդ գործը, և գրեթե յուրաքանչյուր խոշոր քաղաքում, ուր գալիս եմ, վարպետության դասեր եմ տալիս։ Դա կարծես պատմականորեն է դասավորվել, և հատուկ դրա համար ոչինչ չեմ անում»,– ասաց Կուրբատովը «Նովոստի–Արմենիա» գործակալությանը վարպետության դասից առաջ։

Ըստ նրա` վարպետության դասն իր համար ոչ միայն երեխաներին սովորեցնելու, այլ իր համար ինչ–որ նոր բան բացահայտելու ձև է։

«Ցանկանում եմ, որ իմ այցից երեխաներն ու մանկավարժներն ինչ–որ բան ստանան, նաև ձգտում եմ դրական էմոցիաներ ստանալ, երբ տեսնում եմ լավ նվագող երեխաների։ Դա ինձ համար միշտ տոն է»,– ասաց Կուրբատովը։

Նա նշեց, որ իր համար վարպետության դասերի անցկացման ժամանակ գլխավորն իր աշխատանքի արդյունքը տեսնելն է, գտնել բառեր, որոնք հասնում են մանկական սրտին։

Վարպետության դասի ընթացքում հայտնի երաժիշտը ոչ միայն լսել է հատուկ դպրոցի սաների կատարումը և արտահայտել իր պրոֆեսիոնալ կարծիքն ու առաջարկությունները, այլ նաև ինքն է նվագել։

Ալեքսեյ Կուրբատովը Երևան է ժամանել Հայոց ցեղասպանության 100–ամյակին նվիրված համերգին մասնակցելու համար, որը կկայանա հունվարի 30–ին Սպենդիարյանի անվան օպերայի և բալետի ազգային ակադեմիական թատրոնում։ Կուրբատովի կատարմամբ Երևանում կհնչի դաշնամուրի և նվագախմբի համար №2 օպ. 27 կոնցերտը` Դավիթ Մնացականյանի թեմաներով։

Ալեքսեյ Կուրբատովը մի քանի միջազգային բարեգործական հիմնադրամների կրթաթոշակառու է։ Ալեքսեյը ծավալուն համերգային ծրագրով շրջագայել է բազմաթիվ երկրներում, ունի մի քանի աուդիոսկավառակ, մասնակցել է համաշխարհային մակարդակի երաժիշտների համերգներին։

Ալեքսեյ Կուրբատովը զգալի հաջողությունների է հասել նաև որպես կոմպոզիտոր։ Նրա դաշնամուրային, կամերային և նվագախմբային ստեղծագործությունները մշտապես կատարվում են Ռուսաստանում, Ուկրաինայում, Ղազախստանում, Գերմանիայում, Խորվաթիայում, ԱՄՆ–ում և բազմաթիվ դրական կարծիքներ ունեն մամուլում և Համացանցում։ -0-