ԵՐԵՎԱՆ, 24 դեկտեմբերի. /Նովոստի–Արմենիա/. Հայ նկարիչ Լեմս Ներսիսյանի «Բազմաձայն պատարագ» ցուցահանդեսը բացվել է Երևանում, այն նվիրված է Հայոց ցեղասպանության 100–րդ տարելիցին։
Ցուցահանդեսին ներկայացված է մոտ 140 նկար, որոնցից յուրաքանչյուրը պատմում է Հայոց ցեղասպանության ցավի մասին։ Նկարների վրա հեղինակն աշխատել է մեկուկես տարի, միաժամանակ երկու անգամ այցելել է Արևմտյան Հայաստան (ժամանակակից Թուրքիայի տարածք)` հուզական կտավներ ստեղծելու համար։
«Սա իմաստ ունեցող ցուցահանդես է։ Իմ աշխատանքների թվում կան 70 նկարներ, որոնցում ներկայացված են աշխարհահռչակ մարդկանց դիմանկարներն ու արտահայտությունները, ովքեր կոչ են անում ճանաչել Հայոց ցեղասպանությունը», – ասաց Ներսիսյանը։
Նկարչի խոսքով` հավաքածում ստեղծելու ընթացքում հենց այդ 70 նկարների վրա է ծախսել ժամանակի մեծ մասը։
«Որոշ նկարներում Արևմտյան Հայաստանի բնապատկերներն են և հուշարձանները... Որոշ կտավներում ներկայացված ծաղիկները ես նվիրել եմ Ցեղասպանության 1,5 մլն զոհերին», – նշեց Ներսիսյանը։
Նրա խոսքով` աշխատանքները Երևանից հետո կցուցադրվեն նաև Փարիզում և Ստրասբուրգում 2015թ.–ի ապրիլին։
Լեմս Ներսիսյանը ծնվել է 1946թ.–ին Գյումրիում, նա Մանկավարժական գիտությունների միջազգային ակադեմիայի ակադեմիկոս է, Խ. Աբովյանի անվան մանկավարժական ինստիտուտի գեղանկարչության ամբիոնի վարիչն է։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։–0–
