Ալիսա Ֆրեյնդլիխը նշում է 80 ամյակը

ԵՐԵՎԱՆ, 8 դեկտեմբերի. /Նովոստի–Արմենիա/. Թատրոնի և կինոյի դերասանուհի Ալիսա Ֆրեյնդլիխը դեկտեմբերի 8-ին նշում է 80 ամյակը։ ՌԻԱ Նովոստին կենսագրական տվյալներ է ներկայացնում։

Ալիսա Բրունոյի Ֆրեյնդլիխը ծնվել է 1934 թվականի դեկտեմբերի 8–ին Լենինգրադում (այժմ` Սանկտ Պետերբուրգ) հայտնի դերասան Բրունո Ֆրեյնդլիխի ընտանիքում։

1957 թվականին ավարտել է Լենինգրադի Ա.Ն.Օստրովսկու անվան թատերական ինստիտուտի Բորիս Զոնի կուրսը։

1957-1961 թվականներին եղել է Լենինգրադի Կոմիսարժևսկայայի անվան դրամատիկական թատրոնի դերասանուհի։ 1961 թվականին Ֆրեյնդլիխն անցել է Լենսովետի թատերախումբ, որտեղ դարձել է առաջատար դերասանուհիներից մեկը։

1983 թվականից Ֆրեյնդլիխը Գորկու անվան (1992 թվականից` Տովստոնոգովի անվան) դրամատիկական մեծ թատրոնի դերասանուհի է։

Ֆրեյնդլիխը բազմաթիվ դերեր է ունեցել նաև կինոյում։ Նրա առաջնախաղը եղել է դեռ 1955 թվականին Ֆրիդրիխ Էմմերի «Անավարտ վիպակ» ֆիլմում, սակայն երկար տարիներ շարունակ նրան հիմնականում փոքր դերեր էին առաջարկում։ Դերասանուհու յուրահատուկ տաղանդը կինոյում բացահայտվեց միայն 1970–ականներին։ 1974 թվականին նա խաղաց իր առաջին մեծ դերը` Եվգենի Խրինյուկի «Աննան և կոմանդորը» կինովիպակում։ Դերասանուհու համար բեկումնային էր 1976 թվականը, երբ Էլդար Ռյազանովը նրան հրավիրեց «Ծառայողական սիրավեպ» կատակերգական ֆիլմում Լյուդմիլա Պրոկոֆևնա Կալուգինայի դերը խաղալու համար։ Այդ դերի համար Ֆրեյնդլիխը 1977 թվականին «Խորհրդային էկրան» ամսագրի հարցման արդյունքներով ճանաչվել է տարվա դերասանուհի։ 

Դերասանուհին ավելի քան 60 ֆիլմում է նկարահանվել։

Ֆրեյնդլիխը երեք անգամ ամուսնացած է եղել։ Դերասանուհու առաջին ամուսինը նրա համակուրսեցի Վլադիմիր Կարասևն էր (1934-2009)։ Երկրորդ ամուսինը Լենսովետի անվան թատրոնի գլխավոր ռեժիսոր Իգոր Վլադիմիրովը (1919-1999)։ Այդ ամուսնությունից նրանք ունեն (1968 թվականին ծնված)  դուստր Վարվառա անունով` նույնպես դերասանուհի։ Դերասանուհու երրորդ ամուսինը դերասան Յուրի Սոլովեյն էր։ -0-