Հայաստանի մշակույթի նախարարը կմասնակցի Սանկտ–Պետերբուրգի միջազգային համաժողովին

ԵՐԵՎԱՆ, 3 դեկտեմբերի. /Նովոստի–Արմենիա/.  Հայաստանի մշակույթի նախարար Հասմիկ Պողոսյանը կմասնակցի Սանկտ–Պետերբուրգի միջազգային III մշակութային համաժողովին, որը կանցկացվի Ռուսաստանի Հյուսիսային մայրաքաղաքում դեկտեմբերի 7-9–ը։

Պողոսյանը մեկնել է ՌԴ ռուս գործընկեր Վլադիմիր Մեդինսկու հրավերով, հայտնում է գերատեսչության մամուլի ծառայությունը։

Համաժողովի կազմակերպիչներն են ՌԴ մշակույթի և արտաքին գործերի նախարարությունները, Սանկտ Պետերբուրգի քաղաքապետարանը:

Համաժողովին կմասնակցեն տարբեր երկրների մշակույթի նախարարներ, ՌԴ նախագահի աշխատակազմի և կառավարության պատասխանատուներ, դիվանագիտական ներկայացուցչությունների, համաշխարհային ճանաչում ունեցող մշակութային կառույցների ղեկավարներ, մշակույթի և արվեստի, կրթության և գիտության ականավոր գործիչներ,  միջազգային մշակութային համագործակցության ոլորտի փորձագետներ:

Համաժողովի շրջանակում կնշվեն նաև աշխարհի խոշորագույն թանգարաններից մեկի` Պետական Էրմիտաժի 250-ամյա և Էրմիտաժի տնօրեն Մ. Պիոտրովսկու 70-ամյա հոբելյանները, որոնք կուղեկցվեն մի շարք  հանդիսավոր արարողություններով:

Միջոցառման ընթացքում կստորագրվի նաև Հայաստանի և Ռուսաստանի մշակույթի նախարարությունների միջև 2015 թ. աշխատանքային ծրագիրը:

Գործուղման ընթացքում Հ. Պողոսյանը կայցելի նաև Սանկտ Պետերբուրգի ազգագրական և Ռուսական թանգարաններ, որտեղ 2015 թ. կկազմակերպվեն հայկական ցուցահանդեսներ:-0-