ԵՐԵՎԱՆ, 28 նոյեմբերի. /Նովոստի–Արմենիա/. Հայազգի աշխարհահռչակ դիրիժոր Ջորջ Փեհլիվանյանն առաջին անգամ ելույթ կունենա Երևանի Ալ. Սպենդիարյանի անվան օպերայի և բալետի ազգային ակադեմիական թատրոնի բեմում։
«Այդ բեմում 60–ական թվականներին երգել է մայրս, 50 տարի անց ես մեծ հաճույքով ելույթ կունենամ այստեղ Օպերային թատրոնի սիմֆոնիկ նվագախմբի և երգչախմբի հետ»,– ուրբաթ լրագրողներին ասաց մաեստրոն։
Համերգը կկայանա նոյեմբերի 29–ին, կհնչի Բեթհովենի 9–րդ Սիմֆոնիան։
«Ես այդ սիմֆոնիան պատկերացրել եմ զանազան նվագախմբերի հետ աշխարհի բազմաթիվ բեմերում։ Դա շատ ուժեղ ստեղծագործություն է։ Երաժշտությունը պետք է միավորի աշխարհը, և հույս ունեմ, որ այդպես մենք կկարողանանք միավորել նաև մեր հայ ժողովրդին»,– ասաց Փեհլիվանյանը։
Նա նշեց նաև, որ վերջին 20 տարիներին հասցրել է աշխատել հայ երաժիշտների հետ, մասնավորապես` Հայաստանի պետական ֆիլհարմոնիկ նվագախմբի հետ, շատ գոհ է նրանց վարպետության բարձր մակարդակից։
«Ես աշխատել եմ աշխարհի լավագույն նվագախմբերի հետ և հույս ունեմ, որ ժամանակի հետ հայկական կոլեկտիվները նույնպես կհասնեն այդ բարձր մակարդակին»,– ասաց մաեստրոն։
Ջորջ Փեհլիվանյանը ծնվել է 1964 թվականին Բեյրութում։ 1975 թվականին ընտանիքի հետ տեղափոխվել է Լոս Անջելես։ Խմբավարման դասընթաց է անցել Քիջի Ակադեմիայում։ 1991 թվականին հաղթել է Բեզանսոնի երիտասարդ դիրիժորների միջազգային մրցույթում։ 1996-1999 թվականներին նիդեռլանդական Ռեզիդենց–նվագախմբի հրավիրված դիրիժոր է եղել, միաժամանակ 1996-2000 թվականներին նույն պաշտոնն է զբաղեցրել Վիեննայի կամերային նվագախմբում։ 2005-2008 թվականներին գլխավորել է Սլովենական ֆիլհարմոնիայի սիմֆոնիկ նվագախումբը։
Փեհլիվանյանը համագործակցել և ղեկավարել է այնպիսի նվագախմբեր, ինչպիսին են` Լոնդոնի ֆիլհարմոնիկ նվագախումբը, BBC Philharmonic–ը, Իսրայելի ֆիլհարմոնիկ նվագախումբը, Ռոթերդամի ֆիլհարմոնիկ նվագախումբը, Ֆրանսիայի Ռադիոյի ֆիլհարմոնիկ նվագախումբը, Մոնտե–Կառլոյի ֆիլհարմոնիկ նվագախումբը, Իսպանիայի ազգային նվագախումբը, Մոնրեալի սիմֆոնիկ նվագախումբը և այլ նվագախմբեր։ -0-
