Ուորհոլի երկու աշխատանքները կներկայացվեն Christie's աճուրդում

ԵՐԵՎԱՆ, 12 նոյեմբերի. /Նովոստի-Արմենիա/. Ամերիկացի նկարիչ Էնդի Ուորհոլի «Եռակի Էլվիս» և «Չորս Մառլոն» աշխատանքները նոյեմբերի 12-ին կներկայացվեն Christie’s–ի  երեկոյան աճուրդում, հաղորդում է ՌԻԱ Նովոստին:

Ինչպես նշվում է աճուրդի տան մամուլի հաղորդագրության մեջ, որը ստացել է ՌԻԱ Նովոստին, «երկու աշխատանքների ընդհանուր գինը կազմում է մոտ 130 մլն դոլար»:

«Էնդի Ուորհոլի ստեղծագործական գործունեությունը կներկայացվի աճուրդում երկու հռչակավոր մարդկանց՝ Էլվիս Փրեսլիի և Մառլոն Բրանդոյի դիմանկարների միջոցով», - նշվում է հաղորդագրության մեջ:

«Եռակի Էլվիս» դիմանկարում, որը ստեղծվել է 1963թ.-ին Ferus պատկերասրահում Ուորհոլի ցուցահանդեսի համար, Փրեսլիի պատկերը գերիշխում է կտավի վրա, ինչպես ХХ դարի 50-60-ականներին երգիչն էր գերիշխում ամերիկյան էստրադայում:

Հաղորդագրության մեջ նշվում է, որ «Չորս Մառլոն» նկարը ստեղծվել է 1966թ.-ին: «Նկարում Մառլոն Բրանդոն պատկերված է Ջոննի Սթրաբլերի կերպարով, ով 1953թ.-ին էկրան բարձրացած «Խռովարարը» ֆիլմի գլխավոր հերոսն է», - նշվում  է հաղորդագրության մեջ:-0-