Պատշաճ ֆինանսավորման բացակայությունը խանգարում է կին կինոռեժիսորների մասնագիտական աճին. փորձագետներ

ԵՐԵՎԱՆ, 3 նոյեմբերի. /Նովոստի–Արմենիա/. Կին կինոռեժիսորների մասնագիտական աճին խանգարում է պատշաճ ֆինանսավորման բացակայությունը, նման եզրակացության են եկել «Կին» 11–րդ միջազգային կինոփառատոնի շրջանակում Երևանում կազմակերպած կլոր սեղանի մասնակիցները։

Փորձագետները նշել են, որ ֆիլմերի ստեղծման ժամանակ կին ռեժիսորների առջև կանգնած գլխավոր խոչընդոտը ֆինանսավորման բացակայությունն է, և այդպիսի իրավիճակ է ոչ միայն Հայաստանում, որտեղ կինոարդյունաբերությունը նոր է զարգանում։

Կանադացի ռեժիսոր Լեսլի Էն Քոլսը ( Leslie Ann Coles) նշեց, որ այժմ Կանադայում սուր է ռեժիսորների գենդերային հավասարության խնդիրը։ «Կնոջ դերը կինոինդուստրիայում թերագնահատվում է։ Կին ռեժիսորների ֆիլմերը, որպես կանոն, փոքր բյուջե ունեն, նրանց համար դժվար է մրցակցել տղամարդկանց հետ»,– ասաց Քոլսը։ Նա միաժամանակ նշեց, որ Կանադայում, այնուամենայնիվ, ստեղծվել են հատուկ ֆոնդեր, որոնք ֆինանսավորում են կին ռեժիսորների ֆիլմերը։

Ֆրանսիայում, Films Femmes Mediter-ranee կինոփառատոնի կազմակերպիչ Սոնյա Ջոսիֆորտի խոսքով, ֆեմինիստական խմբերը պայքարում են հավասարության համար` հասնելով ոչ թե կանանց նպատակային ֆինանսավորման, այլ հավասար պայմանների ստեղծման։

Կինոքննադատ Կլաուդիա Լենսենը (Claudia Lenssen) կարծում է, որ կինոինդուստրիայում կանանց ինտեգրման խնդիրը կապված է նրանց ֆիլմերի նկատմամբ հոռետեսական վերաբերմունքով։ «Այսօր այսպիսի կարծիք կա` եթե ֆիլմը կին է նկարահանել, ապա այն միայն կանանց համար է։ Դա այդպես չէ, կանայք ֆիլմեր են ստեղծում բոլորի համար։ Իսկ տղամարդիկ ֆիլմեր են նկարում բացառապես տղամարդկանց համար»,– ասել է Լենսենը։

«Կին» 11–րդ միջազգային կինոփառատոնն անցկացվում է Երևանում 2014 թվականի նոյեմբերի 1-5–ը։

Կինոփառատոնում ներկայացված է 15 երկրների 57 ֆիլմ։ Այն նվիրված է հասարակությունում կնոջ դերին և ուղղված է կանանց խնդիրների լուսաբանմանը կինոմատոգրաֆի միջոցով, ինչպես նաև հայ կին ռեժիսորների նկարահանած  ֆիլմերի ներկայացմանը։

Լեսլի Էն Քոլսը, Սոնյա Ջոսիֆերտը և Կլաուդիա Լենսոնը կինոփառատոնի ժյուրիի անդամներ են։

Լեսլի Էն Քոլսի «Սառնարանում» դեբյուտային ֆիլմը մասնակցել է 35 միջազգային կինոփառատոների և ստացել 13 պարգև։

Սոնյա Ջոսիֆորտը Films Femm Mediter-renee փառատոնի կազմակերպիչն է։ Փառատոնն ամեն տարի անցկացվում է Մարսելում։ Փառատոնի նպատակը սկսնակ կին ռեժիսորների ֆիլմերի ցուցադրմանը նպաստելն է։

Կլաուդիա Լենսենը կինոքննադատ է, աշխատում և գրում է բեռլինյան թերթերի և ռադիոյի համար։ 2014 թվականի սեպտեմբերին լույս է տեսել 1970–ականներից մինչ օրս աշխատող կին ռեժիսորների մասին նրա գիրքը։ -0-