Հայտնի քանդակագործ Լևոն Թոքմաջյանը խնդիր չի տեսնում Երևանի կենտրոնում Գարեգին Նժդեհի հուշարձանը կանգնեցնելու հարցում

ԵՐԵՎԱՆ, 3 նոյեմբերի. /Նովոստի-Արմենիա/. Հայտնի քանդակագործ Լևոն Թոքմաջյանը 20–րդ դարի սկզբի հայ ազգային ազատագրական շարժման ականավոր գործիչ Գարեգին Նժդեհի արձանը Երևանի կենտրոնում, այլ ոչ թե համանուն հրապարակում տեղադրելու հարցում խնդիր չի տեսնում։

Հոկտեմբերի 29–ին քաղաքապետարանը հավանության է արժանացրել Նալբանդյան–Արամի–Բյուզանդի–Հանրապետության փողոցների խաչմերուկում Գարեգին Նժդեհի արձանը տեղադրելու նախագծին։ Դրա հեղինակներն են Գագիկ Ստեփանյանը և Հայաստանի վաստակավոր ճարտարապետ Ասլան Մխիթարյանը։

«Իհարկե, այնքան էլ ճիշտ չէ, որ քանդակը պետք է տեղադրվի ոչ թե Նժդեհի անունը կրող հրապարակում, որտեղ այժմ Սուրեն Սպանդարյանի (մարքսիստ–հեղափոխական) արձանն է։ Բայց որևէ խնդիր դրանում չեմ տեսնում։ Ինձ համար կարևոր է ոչ թե արձանի տեղը, այլ դրա ճարտարապետական արժեքը»,– երկուշաբթի մամուլի ասուլիսում ասաց Թոքմաջյանը։

Քանդակագործը միաժամանակ նշեց, որ Հանրապետության փողոցում արձանը տեղադրելու որոշումը կարող է կապված լինել այն բանի հետ, որ Նժդեհի ուսմունքը Հայաստանի հանրապետական կուսակցության հիմքում է։

«Ընդհանրապես, ես Նժդեհի արձանը մի փոքր այլ կերպ էի պատկերացնում` շարժման մեջ, դինամիկայով և ռազմատենչ տեսքով։ Այնուամենայնիվ, յուրաքանչյուր քանդակագործ ունի իր տեսակետը»,– ավելացրեց Թոքմաջյանը։

Նա նշեց նաև, որ ընդհանուր առմամբ հիացած չէ վերջին 20-25 տարիների հայ քանդակագործներով։

«Կարծում եմ, որ արձանները պետք է արտահայտեն հերոսական ոգի և երիտասարդ սերնդին դաստիարակեն հայրենասիրության ոգով, իսկ այսօր ես այդ միտումը չեմ տեսնում»,– ասաց նա։
Նախատեսվում է, որ Գարեգին Նժդեհի արձանը կավարտվի 2015 թվականի վերջին։

Լևոն Թոքմաջյանը ժամանակակից հայտնի հայ քանդակագործներից է։ Երևանը զարդարող հայտնի մի շարք աշխատանքների, այդ թվում` Կարաբալայի, Մարտիրոս Սարյանի, ժողովրդական հերոս Գևորգ Չաուշի քանդակների հեղինակն է։ -0-