Երևանում հայտարարվել են ReAnimania անիմացիոն կինոփառատոնի դափնեկիրների անունները

ԵՐԵՎԱՆ, 31 հոկտեմբերի. /Նովոստի–Արմենիա/. ReAnimania Երևանի վեցերորդ միջազգային անիմացիոն կինոփառատոնի մրցութային ծրագրի հաղթողների անունները հայտնի դարձան նախօրեին դափնեկիրների պարգևատրման և փառատոնի փակման արարողության ժամանակ։

Փակման արարողությունը, որը վարում էր փառատոնի գեղարվեստական ղեկավար Րաֆֆի Մովսիսյանը, անցկացվում էր «Մոսկվա» կինոթատրոնում։

«Լավագույն լիամետրաժ ֆիլմ» անվանակարգում հաղթել է Ալե Աբրեուի «Տղան և աշխարհը» բրազիլական անիմացիոն ֆիլմը, իսկ ժյուրիի հատուկ հիշատակմանն է արժանացել լատվիացի ռեժիսոր Սիգնե Բաումանեի «Գրպանիս քարերը» ֆիլմը։

Ռուս ռեժիսոր Սերգեյ Մերինովի «Պլաստիլինե այբուբեն» ժապավենը ճանաչվել է լավագույն հեռուստատեսային/ուսուցողական հոլովակ, ժյուրին հիշատակել է նաև ֆրանսիացի ռեժիսոր Մորիս Յուվլինի «Մեծ հրաձիգ» աշխատանքը։

«Լավագույն երաժշտական հոլովակ» անվանակարգում լավագույն հոլովակը խորվաթուհի Ելենա Օրոզի «Ֆակոֆբոլան. մի՞շտ, թե՞ երբեք» աշխատանքն է։ Ժյուրիի հատուկ հիշատակմանն է արժանացել Դիեգո Ակելիայի «Շնորհակալություն» բրազիլական հոլովակը։

Լավագույն կարճամետրաժ ֆիլմի համար պարգևի է արժանացել Նասոս Վակալիսի «Ընթրիք մի քանիսի համար» հունա–ամերիկյան աշխատանքը։ Հատուկ նշվել է գերմանացի Ռոբերտ Լեբելի «Քամի» անիմացիոն ֆիլմը։

Լավագույն դիպլոմային ֆիլմ է ճանաչվել Ալեքսանդր Խետմերովի «Աստվածների քաղաքը» չեխական ֆիլմը։ Ժյուրին հիշատակել է նաև Կարոլինա Սպեխտի «Անհավանական ճկուն մարդը» լեհական ֆիլմը։

Իսկ արգենտինացի ռեժիսոր Խուլիո Լուդուենիայի «Քրոնոպներ և ֆամաներ» ֆիլմը ստացել է Վալենտինա Պոդպոմոգովի անվան մրցանակը`լավագույն կոնցեպտուալ լուծման համար։

Ավարտվել է ReAnimania Երևանի վեցերորդ միջազգային անիմացիոն կինոփառատոնի փակման արարողությունը և Արի Ֆոլմանի «Կոնգրես» անիմացիոն ֆիլմի երևանյան պրեմիերան։

ReAnimania անիմացիոն կինոփառատոնը 6-րդ անգամ անցկացվեց Երևանում։ Այն մեկնարկել էր հոկտեմբերի 25-ին։ Փառատոնի շրջանակում ընդհանուր առմամբ ցուցադրվեց ավելի քան 400 լիամետրաժ և կարճամետրաժ անիմացիոն ֆիլմ և հոլովակ։

«Նովոստի–Արմենիա» գործակալությունը փառատոնի տեղեկատվական հովանավորն էր։ -0-