ԵՐԵՎԱՆ, 29 հոկտեմբերի. /Նովոստի-Արմենիա/. «Մոռացված հաղթանակներ. Կովկասյան ճակատը Մեծ պատերազմում» խորագրով միջազգային գիտահետազոտական համաժողով կանցկացվի հոկտեմբերի 30-ին Գյումրիում, հայտնում է Հայաստանում Ռոսսոտրուդնիչեստվոյի ներկայացուցչության մամուլի ծառայությունը:
Համաժողովի կազմակերպիչներն են Ռազմավարական հետազոտությունների ռուսական ինստիտուտը, ՀՀ ԳԱԱ Արևելագիտության ինստիտուտն ու Գյումրու Մ. Նալբանդյանի անվան պետական մանկավարժական համալսարանը՝ Ռուս-հայկական միության և ԵՊՀ-ի մասնակցությամբ:
«1914-18 թթ.-ի Առաջին համաշխարհային պատերազմը դարձել է առաջին գլոբալ հակամարտությունը մարդկության պատմության մեջ: Արևմտյան պատմագրության մեջ այն ստացել է «Մեծ պատերազմ» անունը, Ռուսական կայսրությունում՝ «Երկրորդ հայրենական պատերազմ»: Խորհրդային տարիներին Առաջին աշխարհամարտը կոչվել է «Իմպերիալիստական», իսկ նրա մասին հիշողությունը մոռացության է մատնվել», - նշվում է հաղորդագրության մեջ:
Համաժողովի շրջանակում, որը տեղի կունենա Գյումրու պետական մանկավարժական ինստիտուտում, նախատեսվում է քննարկել հարցերի լայն շրջանակ, որոնք վերաբերում են 1914-1917 թթ.-ի Կովկասյան արշավի ռազմավարական և ռազմաքաղաքական կողմերին:
Համաժողովի օրակարգում ներառված հարցերի թվում են «Կովկասյան վեկտորը Ռուսական կայսրության ղեկավարության քաղաքականության մեջ», «Ռազմական գործողությունները Կովկասի և Պարսկաստանի ռազմական թատերաբեմում», «Մոռացված հերոսներ (Ն.Ն Յուդենիչ, Ֆ.Ի. Նազարբեկով, Մ.Ա. Պրժևալսկի, Ն.Ն. Բարատովիդր)», «Սպիտակ թագավորի նշանի ներքո. հայերի և Կովկասի ժողովուրդների մասնակցությունը պատերազմում», «Դիվանագիտական պայքար Կովկասի տարածքային վերափոխման համար Առաջին համաշխարհային պատերազմի ընթացքում», «Պատերազմի մասին հիշողության վերականգնում, միասնական պատմական գիտակցության ձևավորման խնդիրները» հարցերը:
Միջոցառմանը կմասնակցեն Ռուսաստանի, Հայաստանի, Իտալիայի, Հունաստանի, Բուլղարիայի առաջատար գիտական կենտրոնների պատմության ոլորտի հայտնի գիտնականներ և մասնագետներ:
Համաժողովի աշխատանքներին կմասնակցեն ՌԴ Պետդումայի, Ռոսսոտրուդնիչեստվոյի, ՀՀ-ում ՌԴ դեսպանատան ներկայացուցիչները, ինչպես նաև` ՀՀ ԱԺ պատգամավորները, Հայաստանի նախագահի աշխատակազմի աշխատակիցները, ԶԼՄ-ների ներկայացուցիչներ:
Նախատեսված միջոցառման շրջանակում Գյումրիում տեղի կունենա Իպատևի Սուրբ Երրորդություն վանական համալիրի (Կոստրոմա) տղամարդկանց երգչախմբի և Մոսկվայի «Ժիվայա Ռուս» կազակական համույթի համերգը: -0-
