ԵՐԵՎԱՆ, 29 հոկտեմբերի. /Նովոստի-Արմենիա/. Marvel ամերիկյան ընկերությունը, որը հայտնի է սուպերհերոսների մասին իր պատկերապատումներով և դրանց մասին նկարահանված ֆիլմերով, հրապարակել է ինը նոր կինոժապավենի անվանումներն ու թողարկման ամսաթվերը, հաղորդում է ՌԻԱ Նովոստին:
Ընկերության կայքում հրապարակված տեղեկատվության համաձայն, 2016թ.-ի մայիսի 6-ին վարձույթում կլինի Ամերիկա նավապետի մասին պատմող ֆիլմի երրորդ մասը, որը կկոչվի «Առաջին վրիժառուն. Քաղաքացիական պատերազմ» (Captain America: Civil War): 2016թ.-ի նոյեմբերի 4-ին հանդիսատեսը կարող է դիտել «Դոկտոր Սթրեյնջ» (Dr Strange) ֆիլմը, որը կդառնա համանուն հերոսի մասին պատկերապատումների հիման վրա նկարահանված առաջին ֆիլմը:
2017թ.-ին նախատեսված է ընկերության երեք նոր ֆիլմերի թողարկումը: Այսպես՝ 2017թ.-ի մայիսի 5-ին վարձույթում կլինի «Գալակտիկայի պահապանները» (Guardians of the Galaxy 2) ֆանտաստիկ մարտաֆիլմի երկրորդ մասը: 2017թ.-ի հուլիսի 28-ին նախատեսված է Թորի մասին պատմող ֆիլմի երրորդ մասի թողարկումը, որը կկոչվի «Թոր. Ռագնարոկ» (Thor: Ragnarok): 2017թ.-ի նոյեմբերի 3-ին նախատեսված է «Սև հովազ» (Black Panther) ֆիլմի պրեմիերան:
2018թ.-ին Marvel ստուդիան կթողարկի երեք ֆիլմ: 2018թ.-ի մայիսի 4-ին էկրան կբարձրանա «Վրիժառուները» ֆիլմի երկրորդ մասը, որը կկոչվի «Վրիժառուները. Անվերջ պատերազմ, մաս I» (Avengers: Infinity War, Part 1): 2018թ.-ի հուլիսի 6-ին վարձույթում կհայտնվի «Նավապետ Մարվելը» (Captain Marvel), որը պատմում է սուպերհերոսի և այլմոլորակայինի մասին: 2018թ.-ի նոյեմբերի 2-ին նախատեսված է «Վատ մարդիկ» (Inhumans) ֆիլմի թողարկումը, որը պատմում է մարդկանց մտացածին ռասայի մասին, ովքեր գերունակություններ ունեն:
«Վրիժառուների» երրորդ մասը՝ «Վրիժառուները. Անվերջ պատերազմ, մաս II» (Avengers: Infinity War, Part 2), կինովարձույթում կհայտնվի 2019թ.-ի մայիսի 3-ին:
Marvel ընկերությունը հայտնի է սուպերհերոսների մասին պատմող պատկերապատումներով, որոնցից են «Սարդ մարդը», «Երկաթե մարդը» «Իքս մարդիկ» և այլն: Ընկերությունը հիմնադրվել է 1939թ.-ին և գտնվում է Նյու Յորքում: 2009թ.-ի օգոստոսին Walt Disney Company-ն 4,24 մլրդ դոլարով գնել է Marvel ընկերությունը:-0-
