Հայկական անիմացիոն շուկան հետաքրքրում է օտարերկրյա ստուդիաներին. փորձագետ

ԵՐԵՎԱՆ, 28 հոկտեմբերի. /Նովոստի-Արմենիա/. Օտարերկրյա ստուդիաներին հետաքրքրում է հայկական անիմացիոն շուկան, երեքշաբթի լրագրողներին ասաց «Touch FX» հայկական անիմացիոն ստուդիայի տնօրեն Վահան Սարգսյանը:

«Անիմացիան շատ լուրջ ոլորտ է, և այն պետության աջակցության կարիքն ունի, ընդ որում՝ ոչ միայն ֆինանսական աջակցության: Կարևոր է ճիշտ ներկայացնել մեր երկիրն ու պատմությունը օտարերկրյա շուկայում, և ես համոզված եմ, որ հետաքրքիր նախագծերը շատ կհետաքրքրեն արտասահմանցի մեր գործընկերներին, ովքեր հետաքրքրություն են դրսևորում հայկական շուկայի նկատմամբ», - երեքշաբթի մամուլի ասուլիսի ժամանակ ասաց Սարգսյանը:

Նրա խոսքով՝ օտարերկրյա ընկերություններն անգամ պատրաստ են Հայաստանում ֆիլմ նկարահանել, սակայն առանց պետության աջակցության անիմացիան չի կարող զարգանալ:

Անիմատորն ավելացրեց, որ Հայաստանում շատ են տաղանդավոր երիտասարդները, ովքեր ցանկանում են սովորել և զարգացնել անիմացիան երկրում, և հարկավոր է նրանց խրախուսել:

Նա ընդգծեց, որ Հայաստանը 76 տարում մեծ փորձ է կուտակել անիմացիայի ոլորտում: ReAnimania միջազգային անիմացիոն կինոփառատոնի տնօրեն և հիմնադիր Վրեժ Քասունին իր հերթին նշեց, որ Անիմացիան միջազգային օրվա շրջանակում երեկոյան մասնագետների քննարկումներ կկազմակերպվեն Հայաստանում անիմացիայի զարգացման վերաբերյալ:

«Մեր խնդիրն է ոչ միայն Հայաստանում ներկայացնել տարբեր երկրների լավագույն անիմացիոն ֆիլմերը, այլ նաև բացահայտել խնդիրները, որոնք խոչընդոտում են երկրում անիմացիայի զարգացմանն ու գտնել այդ խնդիրների լուծման բանալին», - ասաց Քասունին:

ReAnimania անիմացիոն կինոփառատոնը 6-րդ անգամ է անցկացվում Երևանում։ Այն մեկնարկել է հոկտեմբերի 25-ին և կտևի մինչև հոկտեմբերի 31-ը։ Փառատոնի շրջանակում ընդհանուր առմամբ կցուցադրվի ավելի քան 400 լիամետրաժ և կարճամետրաժ անիմացիոն ֆիլմ և հոլովակ։ «Նովոստի–Արմենիա» գործակալությունը փառատոնի տեղեկատվական հովանավորն է։ -0-