Սարոյանի պատմվածքի հիման վրա «Իմ սիրտը» ֆիլմի ստեղծողները հուսով են այն ավարտել Հայոց ցեղասպանության 100–ամյակին ընդառաջ
ԵՐԵՎԱՆ, 27 հոկտեմբերի. /Նովոստի–Արմենիա/. Վիլյամ Սարոյանի «Գեղեցիկ սպիտակ ձիու ամառը» պատմվածքի հիման վրա «Իմ սիրտը» անիմացիոն ֆիլմը կարող է ավարտին հասցվել 2015 թվականին` Հայոց ցեղասպանության 100–ամյակին ընդառաջ` շահագրգիռ գործընկերների առկայության դեպքում, ասաց ֆիլմի պրոդյուսեր Վալենտին Լապինը։
«Իմ սիրտը» ֆիլմի աշխատանքային նյութի ցուցադրությունը կկայանա երկուշաբթի Երևանում հոկտեմբերի 25–31–ն անցկացվող ReAnimania փառատոնի շրջանակում։
«Մենք եկել ենք Հայաստան, որպեսզի գտնենք գործընկերների, որոնց օգնությամբ կկարողանանք ավարտել ֆիլմը մինչև 2015 թվականը, ինչպես նաև այն բանի համար, որ նյութն առավելագույնս մոտեցնենք բոլոր նրանց, ում համար կարևոր է Սարոյանի ստեղծագործությունը և Հայոց պատմությունը»,– ասաց Լապինը ֆիլմի աշխատանքային նյութի ցուցադրության ժամանակ։
Ըստ նրա` ֆիլմի ստեղծման հինգ տարվա աշխատանքի ընթացքում նկարահանվել է նյութի 50 տոկոսը (30 րոպե)։ Ֆիլմի ստեղծողները նաև կապվել են Սարոյանի հիմնադրամի հետ և համաձայնեցրել են նրանց հետ ստեղծագործության ադապտացման իրավունքները։
Ժապավենի ռեժիսոր Իլյա Յուդովիչն իր հերթին նշեց, որ իր համար մեծ պատիվ է ներկայացնել այդ նախագիծը Հայաստանում։
«Մենք կփորձենք խտացնել հայրենիքի նկատմամբ կարոտախտի զգացումը ֆիլմի պլաստիլինե աշխարհում։ Ֆիլմի նախագիծն ի սկզբանե կամավորական էր և ներքին մեծ ազդակ ուներ։ Շատ ենք ուզում, որ այդ նախագիծն իրականություն դառնա»,– ասաց Յուդովիչը։
Պատմելով ֆիլմի աշխատանքի մասին` Յուդովիչը նշեց, որ իր համար ամենակարևորն այն կոլորիտն էր, որը նա զգաց Սարոյանի մոտ։
«Ֆիլմում խաչվում են մի քանի թեմաներ։ Պատմություն երկու եղբայրների մասին, ովքեր երազում են սպիտակ ձիով զբոսնել, պատմությունը ծավալվում է կորսված հայրենիքի ֆոնին, քանի որ ֆիլմում խոսքը Ցեղասպանությունից փրկված մարդկանց ընտանիքի մասին է»,– պատմեց Յուդովիչը։
Ըստ նրա` հայ ժողովրդի սարսափելի ողբերգության ֆոնին ցուցադրված սովորական պատմությունն այլ իմաստ է ստանում։ Իսկ առանցքային տեսարանը, երբ տղաները տիրոջն են վերադարձնում գողացած սպիտակ ձին, մետաֆիզիկական նշանակություն է ձեռք բերում։
«Նովոստի–Արմենիա» գործակալության այն հարցին, թե ինչը ստիպեց նրան ընտրել Սարոյանի ստեղծագործությունը, Յուդովիչը հայտնեց, որ «Սարոյանը զարմանալիորեն բարություն է ուղարկում աշխարհ»։ «Սարոյանը բացում է մարդկանց սրտերը և բարություն է արթնացնում»,– ավելացրեց նա։
Այս տարի ReAnimania-ի մրցութային ծրագրի հինգ անվանակարգերում կցուցադրվի 200 ֆիլմ, իսկ փառատոնի շրջանակում ընդհանուր առմամբ կցուցադրվի ավելի քան 400 լիամետրաժ և կարճամետրաժ անիմացիոն ֆիլմ և հոլովակ:
ReAnimania միջազգային անիմացիոն կինոփառատոնն առաջին անգամ անցկացվել է Երևանում 2009թ.-ի հոկտեմբերի 3-6-ը։Նախագծի նպատակն անիմացիոն արվեստի զարգացմանն օժանդակելն է, համաշխարհային կարգի նկարիչ–անիմատորների նոր սերունդ դաստիարակելը և համաշխարհային ասպարեզում հայ անիմատորների աշխատանքների ցուցադրության համար նոր ֆորում կազմակերպելը, ինչպես նաև հայ հանդիսատեսին ամբողջ աշխարհի անիմացիոն լավագույն ֆիլմերը ներկայացնելը։
«Նովոստի–Արմենիա» գործակալությունը փառատոնի ինֆորմացիոն հովանավորն է:-0-
