Վատիկանի մշակույթի քահանայապետական խորհրդի նախագահը Հայ Եկեղեցու հիմնադրի մասին իր աշխատությունն է ներկայացրել

ԵՐԵՎԱՆ, 27 հոկտեմբերի. /Նովոստի–Արմենիա/. Վատիկանի մշակույթի քահանայապետական խորհրդի նախագահ, կարդինալ Ջանֆրանկո Ռավազին երկուշաբթի Երևանի պետական համալսարանում ներկայացրեց իր «Սուրբ Գրիգոր Լուսավորիչ. Քրիստոնեության ընդհանուր ժառանգություն» աշխատությունը` հայերեն և ռուսերեն թարգմանությամբ։

«Մենք համարում ենք ձեզ առաջին քրիստոնյա ազգը, որն ընդունեց Քրիստոնեությունը 301 թվականին: Նշեմ, որ Գրիգոր Լուսավորիչը նաև արևմտյան մշակույթի մի մասն է»,– ասաց կարդինալ Ռավազին իր գրքի շնորհանդեսի ժամանակ:

Ըստ նրա` կրոնն ու մշակույթը փոխկապակցված են։ «Արվեստն ու հավատքը քույրեր են, հավատքն ու մշակույթը, հատկապես արևմտյանը, միշտ ձեռք ձեռքի են քայլել։ Գրիգոր Լուսավորչին արժևորելը ոչ միայն կրոնական, նաև մշակութային հարց է, քանի որ ինքնության հարց է: Եթե չլիներ քրիստոնեությունը, չէր լինի մտքի թռիչքը:  Հայկական խաչքարերը, ձեռագրերը, եկեղեցիներն ու հուշարձաններն աղաղակում  են հայկական մշակույթի մասին»,– ասաց նա։

Կարդինալի խոսքով` իր հեղինակած գիրքը շատ կարևոր է հատկապես երիտասարդների համար, այն կարող է ուղեցույց լինել՝ ճանաչելու այն վայրերը, որտեղ գտնվում են հայ մշակույթի կենդանի ապացույցները՝ խաչքարերը:

«Հաջորդ տարի նշվելու է հարյուրամյակն այն մեծ արհավիրքի, որը տեղի ունեցավ 1915 թվականին՝ Հայոց ցեղասպանության: Երիտասարդ տարիներին դրամատիկ այս ողբերգությանն առաջին անգամ ծանոթացել եմ Ֆրանց Վերֆելի «Մուսա լեռան քառասուն օրը» վեպից, այնուհետև այլ գործեր ևս կարդացի»,- ասաց նա` ավարտելով իր խոսքը Ցեղասպանության զոհ դարձած հայ մեծ բանաստեղծ Դանիել Վարուժանի խոսքերով։ 

Կարդինալ Ռավազին առաջին անգամ ԵՊՀ է այցելել 2011 թվականին, երբ ստացել է Երևանի պետական համալսարանի պատվավոր դոկտորի աստիճան։ -0-