Հայտնի դաշնակահար Տիգրան Համասյանը Հայոց ցեղասպանության 100-րդ տարելիցին նվիրված 100 համերգ կունենա
ԵՐԵՎԱՆ, 21 հոկտեմբերի. /Նովոստի-Արմենիա/. Հայտնի հայ դաշնակահար Տիգրան Համասյանը նախատեսում է աշխարհի տարբեր երկրներում 100 համերգ կազմակերպել 1915թ.-ին Օսմանյան կայսրությունում տեղի ունեցած Հայոց ցեղասպանության զոհերի հիշատակին:
«Մեկ շաբաթ առաջ մենք Երևանի պետական կամերային երգչախմբի հետ՝ Հարություն Թոփիկյանի գլխավորությամբ, ավարտեցինք V-XX դարերի հայկական հոգևոր երաժշտության ստեղծագործություններից բաղկացած ձայնասկավառակի ձայնագրությունը, որոնք ես մշակել էի դաշնամուրի և երգչախմբի համար: Մտադիր ենք ներկայացնել այդ սկավառակը հաջորդ տարի աշնանը՝ նվիրելով այն Հայոց ցեղասպանության 100-րդ տարելիցին», - երեքշաբթի մամուլի ասուլիսի ժամանակ ասաց Համասյանը:
Նրա խոսքով՝ հենց այդ ստեղծագործությունները կհնչեն 100 համերգների ժամանակ, որոնք նա կունենա երգչախմբի հետ համատեղ աշխարհի տարբեր երկրներում:
«Մենք արդեն մոտ 20 հրավեր ենք ստացել այն երկրներից, որտեղ բազմաթիվ հայեր են բնակվում: Մեծ մասամբ դրանք եվրոպական երկրներ են՝ Բելգիան, Ֆրանսիան: Նախատեսում ենք ելույթ ունենալ նաև Թուրքիայում», - ասաց երաժիշտը:
Տիգրան Համասյանը բազմաթիվ մրցանակների դափնեկիր է: Նա մրցանակային տեղեր է զբաղեցրել Փարիզում, Մոսկվայում, Մոնակոյում և աշխարհի այլ քաղաքներում կազմակերպված մրցույթների ժամանակ: Այժմ նա ելույթ է ունենում համաշխարհային ջազ-աստղերի հետ, ստեղծում է նոր ստեղծագործություններ, ելույթ է ունենում աշխարհի տարբեր երկրներում:
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
