Երևանի կրկեսի ղեկավարը կմասնակցի խորհրդային և ռուսական կրկեսի 95–ամյակին նվիրված միջոցառումներին
«Հոբելյանական միջոցառումների ծրագրում նախատեսված է կրկեսային արվեստի զարգացման խնդիրներին նվիրված խորհրդաժողով, որի շրջանակներում Սոս Պետրոսյանը կներկայացնի հայկական կրկեսի մասին իր թեզը, որտեղ նա անդրադառնում է հայկական ժամանակակից կրկեսային արվեստին և գեղարվեստական արժեքներին»,– ասվում է «Նովոստի–Արմենիա» գործակալություն ստացված մամուլի հաղորդագրությունում։
Խորհրդաժողովի Պատվավոր հյուրերը՝ տարբեր երկրների կրկեսային գործիչները կհանդիպեն նաև Միխայիլ Ռումյանցևի («Կարանդաշ«) անվան կրկեսային և էստրադային արվեստի պետական ուսումնարանի սաների և դասախոսական կազմի հետ: Այս ուսումնարանում է 60-ականների կեսերին ուսանել նաև Սոս Պետրոսյանը: Եվ կազմակերպվելիք «վարպետության դասերի» շրջանակում Սոս Պետրոսյանն սկսնակ արտիստներին կպատմի իր անցած ուղու և կուտակած փորձի մասին:
Հոբելյանական Գալա-ներկայացումը նախատեսված է հոկտեմբերի 11-ին՝ Ցվետնոյ բուլվարի Նիկուլինի անվան մոսկովյան կրկեսում: Հեքիաթաշուք շոուն, ինչպես խոստանում են կազմակերպիչները, իր յուրահատկությամբ կտպավորի ինչպես շարքային հանդիսատեսին, այնպես էլ՝ մանեժի անվանի վարպետներին: Գալա-ներկայացումը ներառելու է ամենատարբեր կրկեսային ժանրերի ներկայացուցիչների. հանդիսատեսին կցուցադրվեն տաչանկայով նժույգների վազք, օդային մարմնամարզիկների, էկվիլիբրիստների, ձեռնածուների և այլ արտիստների ելույթներ:-0-
