ԵՐԵՎԱՆ, 6 հոկտեմբերի. /Նովոստի–Արմենիա/. Ռուսական մշակույթի օրեր կանցկացվեն են Հայաստանում հոկտեմբերի 7–10–ը «ԿՐԵԴՈ Պոեզիայի թատրոն» Կարելիայի տարածաշրջանային հասարակական կազմակերպության նախաձեռնությամբ, հայտնում է Ռոսսոտրուդնիչեստվոյի ներկայացուցչության մամուլի ծառայությունը։
Նախագիծն իրականացվում է «Ռուսկի միր» հիմնադրամի, Պետրոզավոդսկի քաղաքային օկրուգի ղեկավարության, Էջմիածնի քաղաքապետարանի, Երևանի պետական համալսարանի Ռուսական կենտրոնի և Հայաստանի Հանրապետությունում Ռոսսոտրուդնիչեստվոյի ներկայացուցչության օժանդակությամբ։
Նախագծի շրջանակում Երևանում, Վանաձորում և Էջմիածնում կկազմակերպվեն շնորհանդեսներ, ռուսաց լեզվի, գրականության ուսումնասիրության նկատմամբ հետաքրքրության բարձրացմանը և մասսայականացմանը, Հայաստանի տարածքում Ռուսական Հյուսիսի ժողովրդական մշակույթի ուսումնասիրությանն ուղղված ուսումնական և ստեղծագործական միջոցառումներ։
Երևանի պետական համալսարանի և Վանաձորի Հովհ. Թումանյանի անվան պետական մանկավարժական համալսարանի ուսանողների և դասախոսների համար ծրագրված են Պետրոզավոդսկի պետական համալսարանի ռուսաց լեզվի և գրականության ամբիոնի պրոֆեսոր Իրինա Սպիրիդոնովայի և ռուսաց լեզվի ամբիոնի դոցենտ Անդրեյ Կոտովի բաց դասախոսությունները, սեմինարներ և կլոր սեղաններ։
Համերգներ կունենան «Կատյուշա» ռուսական երգի անսամբլը և Սանկտ Պետերբուրգից ժամանած մեներգիչ Սերգեյ Ռուսանովը։
Նախագծի կարևոր կողմն այն է, որ միջոցառումները կանցնեն ինչպես Հայաստանի տարածքում, այնպես էլ Պետրոզավոդսկում։ 2014 թվականի հոկտեմբերի 14-16–ը Երևանի պատվիրակությունը Ռուսագետների հայկական ասոցիացիայի նախագահ, Երևանի պետական համալսարանի պրոֆեսոր Լիանա Մաթևոսյանի գլխավորությամբ կայցելի Պետրոզավոդսկ։ Այցի շրջանակում կկայանան պաշտոնական հանդիպումներ քաղաքի ադմինիստրացիայի ներկայացուցիչների հետ, դասախոսություններ և սեմինարներ Պետրոզավոդսկի պետական համալսարանի բանասիրական ֆակուլտետի ուսանողների համար, «Ռուսաց լեզուն Հայաստանի կրթական տարածքում» կլոր սեղան Երևանի պետական համալսարանի Ռուսական կենտրոնի ղեկավար Արուսյակ Ներսեսյանի մասնակցությամբ։
«Հայ հոգու մեղեդիները Կարելիայի հողում» համերգային ծրագրում երիտասարդ երևանցի դերասաններ և երաժիշտներ Պապ Պողոսյանը և Հայկ Կարապետյանը կկատարեն «Արա Գեղեցիկ» մոնոներկայացումից (Սերգեյ Փարաջանովին նվիրված) մի դրվագ, կբացեն հնագույն Հայաստանի առասպելների գաղտնիքները։ -0-
Ն.Ա.
