ԵՐԵՎԱՆ, 19 սեպտեմբերի. /Նովոստի-Արմենիա/. Հայտնի բրիտանացի գրող Մեգ Ռոսոֆը «Creative writing» թեմայով վարպետության դաս է անցկացրել ԵՊՀ-ի ժուռնալիստիկայի ֆակուլտետի ուսանողների համար:
Գրողը գտնվում է Երևանում որպես «Գրական տապան» ամենամյա միջազգային փառատոնի հատուկ հյուր, որն անցկացվում է Հայաստանում սեպտեմբերի 18-28-ը:
Ուսանողների հետ հանդիպման ընթացքում Ռոսոֆը պատմել է գրական տեքստեր և գրքեր գրելու վարպետության և այն ստեղծագործական փուլերի մասին, որոնց միջով անցնում է գրողը և իր գիրքը ստեղծագործական գործընթացում:
Փառատոնի կազմակերպիչները նշում են, որ բացի Ռոսոֆից փառատոնի պատվավոր հյուրերի թվում է աշխարհահռչակ լեհ գրող, «Միայնություն ցանցում» բեսթսելլերի հեղինակ Յանուշ Վիշնևսկին:
Այս տարի փառատոնի շրջանակներում Հայաստան կայցելեն գրողներ աշխարհի 11 երկրներից: Համաշխարհային գրականությունը ներկայացնող հյուրերը կմասնակցեն մասնագիտական քննարկումների, կհանդիպեն հայաստանյան բուհերի ուսանողների հետ, իրենց փորձն ու պատկերացումները կկիսեն ժամանակակից հայ գրողների հետ:
Փառատոնի ծրագրից կարելի է առանձնացնել սեպտեմբերի 27-ին նախատեսված միջոցառումներից մեկը: Հայ դասական երաժշտության հայր, բանաստեղծ, բանահավաք, ազգագրագետ, երաժշտագետ, խմբավար և մանկավարժ Կոմիտաս Վարդապետի (Սողոմոն Գևորգի Սողոմոնյան) ծննդյան օրը համաշխարհային գրականության ներկայացուցիչները կայցելեն Կոմիտասի անվան պանթեոն, որտեղ կմիանան «100 հազար պոետ՝ հանուն փոփոխության» նախաձեռնությանը, որի նպատակը արվեստի միջոցով աշխարհը փոխելն է։
Բացի այդ, փառատոնի շրջանակներում Գաֆեսջյան արվեստի կենտրոնի հատուկ հանդիսությունների սրահում տեղի կունենա հանդիպում բրիտանացի հանրաճանաչ գրող Մեգ Ռոզոֆի հետ, որի ընթացքում կցուցադրվի նաև նրա ստեղծագործության հիման վրա նկարահանված «Ինչպես եմ ապրում հիմա» ֆիլմը
Սեպտեմբերի 27-ին տեղի կունենա Յանուշ Վիշնևսկու «Գրանդ» վեպի հայերեն թարգմանության շնորհանդեսը:
Փառատոնը կազմակերպվել է Արտասահմանյան երկրների հետ մշակութային համագործակցության հայկական միության կողմից` ՀՀ մշակույթի նախարարության աջակցությամբ: Միջոցառումն առաջին անգամ անցկացվել է 2001 թ.-ին:-0-
