ԵՐԵՎԱՆ, 16 սեպտեմբերի. /Նովոստի-Արմենիա/. Արամ Խաչատրյանի անվան երկրորդ միջազգային երաժշտական փառատոնի բացման համերգը, որը տեղի կունենա երեքշաբթի Ա. Խաչատրյանի անվան համերգասրահում, կնվիրվի Երևանի պետական համալսարանի 95-ամյակին, երեքշաբթի լրագրողներին տեղեկացրեց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
«Այս տարի փառատոնը կտևի մինչև դեկտեմբերի 4-ը, փառատոնի ծրագրում ներառված է 16 համերգ, կհնչի ժամանակակից կոմպոզիտորների երաժշտությունը: Ինչ վերաբերում է այսօրվա բացմանը, ապա մենք որոշեցինք աննախադեպ, էքսպերիմենտալ համերգ կազմակերպել», - ասաց Սմբատյանը:
Նրա խոսքով՝ համերգին կմասնակցի Հայաստանի պետական երիտասարդական նվագախումբը և բրիտանացի DJ SWITCH-ը, ով DMC World DJ Championship ամենամյա մրցույթում բազմաթիվ անգամ նվաճել է լավագույն դիջեի կոչումը:
«Մի շարք պրեմիերաներ կլինեն, մասնավորապես՝ Գաբրիել Պրոկոֆևի` դիջեի և նվագախմբի կոնցերտը և Մայլս Հենկոկի` դիջեի, բիթբոքսերի և նվագախմբի կոնցերտը: Իհարկե, ավելի վաղ մենք անգամ չէինք պատկերացնում, թե ինչպես կարելի է համադրել այս երաժշտությունը, սակայն այսօր մենք ցույց կտանք, որ դա հնարավոր է», - պարզաբանեց Սմբատյանը:
VivaCell-MTS ընկերության (որը նվագախմբի գլխավոր գործընկերն է) գլխավոր տնօրեն Ռալֆ Յիրիկյանն իր հերթին տեղեկացրեց, որ այսուհետ համերգներին կարելի է հետևել առցանց ռեժիմով փառատոնի և Պետական երիտասարդական նվագախմբի կայքերում (www.akhif.am և www.syoa.tv):
«Տեխնոլոգիաները պետք է ծառայեն մշակույթին, և որքան որակյալ մենք կկարողանանք օգտագործել դրանք, այնքան ավելի լավ կկարողանանք պահպանել մեր ինքնատիպությունը», - ասաց Յիրիկյանը:
Արամ Խաչատրյանի անվան առաջին միջազգային փառատոնը, որը նվիրված էր հռչակավոր կոմպոզիտորի 110-ամյակին, անցկացվել է 2013թ.-ին:
«Նովոստի-Արմենիա» գործակալությունը նվագախմբի տեղեկատվական գործընկերն է:-0-
