Բեսոնը իր նոր` «Լյուսի» ֆիլմի մասին. կանայք են կառավարում աշխարհը

ԵՐԵՎԱՆ, 9 սեպտեմբերի. /Նովոստի–Արմենիա/. Ֆրանսիացի ռեժիսոր Լյուկ Բեսոնը Մոսկվայում ներկայացրել է իր նոր «Լյուսի» ֆիլմը` Սքարլեթ Յոհանսոնի գլխավոր դերակատարմամբ և պատմել կինոժապավենի գլխավոր գաղափարի մասին` սեփական գիտելիքների փոխանցումը հաջորդ սերունդներին։

«Կանայք են կառավարում աշխարհը։ Ես պարզապես փորձում եմ լավ կերպարներ ստեղծել, կանանց համար հազվադեպ են լավ կերպարներ գրվում։ Ինձ հետաքրքիր է տղամարդու թուլության և կնոջ ուժեղ կողմերի թեման»,– ասել է ռեժիսորը Մոսկվայում երեքշաբթի կայացած ասուլիսում։

Բեսոնի խոսքով` ֆիլմի գլխավոր միտքն այն է, թե որքան կարևոր է, որ մարդիկ իրենց գիտելիքները փոխանցեն հաջորդ սերունդներին։

«Այն, ինչ նա (Լյուսին) հասկացել է կյանքում այն է որ, կարևոր է կյանքը փոխանցել։ Այն, ինչ դու հասկանում ես, դու փոխանցում ես մյուս սերունդներին։ Միտքն այն չէ, որ պետք է ինչ–որ բան անել կյանքում, այլ այն, որ պետք է կյանքը փոխանցել, գիտելիքները փոխանցել։ Նա (Լյուսին) չի որոշում` ով է լավն ու ով` վատը, նա պարզապես ինչ–որ բան է հասկանում և այդ գիտելիքները փոխանցում է»,– ասել է Բեսոնը։

Բեսոնը նաև պատմել է, թե ինչով է առաջնորդվում իր ֆիլմերում գլխավոր դերերի համար դերասանուհիների ընտրության հարցում։

«Սկզբում հայտնվում է սցենարը, դրանում` կերպարը։ Պետք է գտնել այդ կերպարը լավագույնս մարմնավորող դերասանուհու։ Միակ մոտիվացիան, որ ես օգտագործում եմ` կարո՞ղ է այդ դերասանուհին խաղալ այդ կերպարը»,– ասել է նա, հաղորդում է «ՌԻԱ Նովոստին»։

Յոհանսոնը («Վրիժառուները», «Մարգարտե ականջօղով աղջիկը», «Մատչ–փոինթ», «Պրեստիժ») ֆիլմում խաղացել է մի աղջկա, ով ստիպված թմրանյութ տարածող է դարձել։ Փոխադրման ծրագիրը ձախողվում է, ինչի հետևանքով հերոսուհու օրգանիզմ է թափանցում փորձնական թմրանյութ, ինչի պատճառով Լյուսին  գերունակություններ է ստանում։

Ֆիլմում նկարահանվել է նաև Մորգան Ֆրիմենը, ով հայտնի է «Միսս Դեյզիի վարորդը», «Բրյուս ամենակարող», «Սև ասպետ» ֆիլմերով, և Չխվե Մին Սիքը («Օլդբոյ», «Ցավակցություն տիկին Վրեժին»)։ 

«Լյուսին» ռուսական վարձույթում կհայտնվի սեպտեմբերի 11–ին։-0-