ԵՐԵՎԱՆ, 4 օգոստոսի. /Նովոստի–Արմենիա/. «Նովոստի–Արմենիա» միջազգային լրատվական գործակալությունը պարգևատրվել է «Ոսկե ծիրան-2014» Երևանի 11–րդ միջազգային կինոփառատոնի շնորհակալագրով։
«Ոսկե ծիրանը» շնորհակալություն է հայտնում «Նովոստի–Արմենիա» գործակալության գլխավոր տնօրեն Գալինա Դավիթյանին և պարգևատրում շնորհակալագրով Երևանի 11–րդ միջազգային կինոփառատոնի աշխատանքների լայնածավալ լուսաբանմանն օժանդակելու համար»,– ասվում է շնորհակալագրում, որը ստորագրել են «Ոսկե ծիրան» կինոփառատոնի տնօրեն, կանադացի ռեժիսոր Ատոմ Էգոյանը, կինոփառատոնի խորհրդի պատվավոր նախագահ Շառլ Ազնավուրը և կինոփառատոնի տնօրեն Հարություն Խաչատրյանը։
«Ոսկե ծիրան» միջազգային 11–րդ կինոփառատոնը Երևանում անցկացվեց հուլիսի 13-20–ը։ Այս տարի կինոփառատոնի հյուրերի ցանկում էին հարավկորեական կինոյի վարպետ Կիմ Կի Դուկը, չինացի հայտնի ռեժիսոր Ցզյա Չժանկեն, իսրայելցի ռեժիսոր Ամոս Գիտայը, Ֆրանսիայում աշխատող վրացի լեգենդար ռեժիսոր` աշխարհի գրեթե բոլոր խոշոր փառատոների մրցանակակիր Օտար Իոսելիանին։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչվածներից մեկը: Այդ տարիների ընթացքում Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։ 2010 թվականին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:
«Նովոստի-Արմենիա» գործակալությունն ընդգրկված է հայկական լրատվական շուկայի առաջատարների ցանկում։ Գործակալության հիմնական նպատակը Հայաստանի քաղաքական, սոցիալական և մշակութային կյանքի անկողմնակալ լուսաբանումն է։
Yandex.ru որոնողական համակարգի վարկածով «Նովոստի-Արմենիա» գործակալությունը հայկական ինտերնետ–ռեսուրսների եռյակում է։
«Նովոստի-Արմենիա» գործակալությունը 2009թ. մարտին լավագույնն է ճանաչվել «Եվրոպական թեմաների մոնիտորինգը հայկական ԶԼՄ-ներում» ծրագրի «Եվրոպական թեմաներն առավել լայնորեն լուսաբանող ԶԼՄ» անվանակարգում: Մրցույթն իրականացվել է «Եվրոպական ինտեգրացիա» հասարակական կազմակերպության և Հայաստանում Մեծ Բրիտանիայի դեսպանատան կողմից:
2009թ.-ի հուլիսին Business Initiative Directions (BID) միջազգային կազմակերպությունը «Նովոստի-Արմենիա» գործակալությանը «Gold» կատեգորիայի Միջազգային աստղ մրցանակ է շնորհել։-0-
