ԵՐԵՎԱՆ, 24 հուլիսի. /Նովոստի-Արմենիա/. Հայաստանի պետական երիտասարդական նվագախումբը Չինաստանում անցկացվող Ֆրեդերիկ Շոպենի անվան երիտասարդ դաշնակահարների միջազգային 9-րդ մրցույթում հանդես կգա որպես պաշտոնական նվագախումբ, հայտնում է նվագախմբի մամուլի ծառայությունը:
«Միջազգային մրցույթների պատմության մեջ առաջին անգամ հայկական կոլեկտիվը հրավեր է ստացել հանդես գալու Ասիայում անցկացվող միջազգային մրցույթի շրջանակներում` որպես մրցույթի պաշտոնական նվագախումբ: Հատկանշական է, որ Երիտասարդականը Չինաստանի Ֆոշան քաղաքում Ֆրեդերիկ Շոպենի անվան երիտասարդ դաշնակահարների միջազգային 9-րդ մրցույթի շրջանակներում ելույթ կունենա որպես պաշտոնական նվագախումբ», - նշվում է հաղորդագրության մեջ:
Նվագախումբը ելույթ կունենա օգոստոսի 11-18-ը եզրափակիչ փուլ անցած մասնակիցների հետ, ինչպես նաև հանդես կգա մրցույթի գալա-համերգին: Նվագախումբը ելույթ կունենա նաև երկու առանձին համերգով՝ ներկայացնելով բազմաժանր և յուրահատուկ համերգային ծրագիր:
Ֆրեդերիկ Շոպենի անվան երիտասարդ դաշնակահարների միջազգային մրցույթը երաժշտական աշխարհի ամենահեղինակավոր և նշանակալի մշակութային միջոցառումներից է:
Հայաստանի երիտասարդական նվագախումբը ստեղծվել է 2005 թ.-ի նոյեմբերին, 2008 թ.-ին պետական նվագախմբի կարգավիճակ է ստացել: Նվագախմբի կազմում ելույթ են ունենում միջազգային մրցույթների դափնեկիրներ և Վլադիմիր Սպիվակովի միջազգային բարեգործական հիմնադրամի կրթաթոշակառուներ:-0-
