Քշիշտոֆ Զանուսսին արժանացել է «Ոսկե ծիրան» փառատոնի և Մայր Աթոռ Սուրբ Էջմիածնի «Եղիցի լույս» հատուկ մրցանակին
ԵՐԵՎԱՆ, 18 հուլիսի. /Նովոստի-Արմենիա/. Աշխարհահռչակ կինոռեժիսոր Քշիշտոֆ Զանուսսին Երևանի «Ոսկե ծիրան» XI միջազգային կինոփառատոնի շրջանակենում արժանացել է փառատոնի և Մայր Աթոռ Սուրբ Էջմիածնի «Եղիցի լույս» հատուկ մրցանակին:
Մշակութային և մարդասիրական արժեքների քարոզչության և կինոարվեստում կատարած զգալի ներդրման համար կինոռեժիսորին պատվավոր մրցանակը հանձնել է Սմենայն Հայոց Գարեգին Երկրորդ Կաթողիկոսը:
«Քրիստոնեությունն աղբյուր է, ապագա է, այլ ոչ թե անցյալ: Քրիստոսի վարդապետությամբ լուսավորված մարդը շարունակելու է բարիք գործել», - ասաց Զանուսսին:
Ամենայն Հայոց Կաթողիկոսն իր հերթին ընդգծեց, որ մարդուն շնորհված արարելու աստվածապարգև հատկությունը առավել չափով դրսևորվում է արվեստի ստեղծագործություններով, որոնցից է նաև զարգացման մեծ ճանապարհ անցած կինոարվեստը:
«Կինոն` որպես արվեստի ստեղծագործություն, բարձր և կարևորագույն առաքելություն ունի իր ներազդող հզոր միջոցով սերմանելու բարին ու գեղեցիկը մարդկային սրտերից ներս», - ասել է Գարեգին Երկրորդը: Նա կինոն համարել է այն ուղիներից մեկը, որոնք թույլ են տալիս հաղթահարել արդի մարտահրավերները և նպաստել մարդկության ընթացքին դեպի խաղաղ, բարեգործ աշխարհ:
Երևանի թատրոնի և կինոյի պետական ինստիտուտի ռեկտոր Դավիթ Մուրադյանն ընդգծեց, որ Քշիշտոֆ Զանուսսին ժամանակակից կինոյի փիլիսոփաներից մեկն է: Նա հատկապես նշեց Հայաստանի և հայկական մշակույթի հետ Զանուսսի սերտ կապերն՝ ընդգծելով, որ Սերգեյ Փարաջանովի համաշխարհային ճանաչումը սկսվեց հենց Զանուսսի ճամպրուկից:
Մուրադյանը պարզաբանեց, որ Սերգեյ Փարաջանովի հալածանքների տարիներին Քշիշտոֆ Զանուսսին իր ընկերների հետ կարողացավ երկրից դուրս հանել Սերգեյ Փարաջանովի «Սայաթ-Նովա» ֆիլմի անգին ժապավենները:
Երևանի «Ոսկե ծիրան» XI միջազգային կինոփառատոնը մեկնարկել է կիրակի Երևանում և կտևի մինչև հուլիսի 19-ինը:
«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչվածներից մեկը: Այդ տարիների ընթացքում Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։ 2010 թվականին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:
«Նովոստի-Արմենիա» գործակալությունը փառատոնի ինֆորմացիոն հովանավորն է:-0-
