ԵՐԵՎԱՆ, 15 հուլիսի./Նովոստի-Արմենիա/. Հայաստանի և Իսրայելի ժողովուրդների պատմության միջև կարելի է զուգահեռներ անցկացնել և գտնել մի շարք նմանություններ: Այդ ժողովուրդները կապված են սերտ պատմական կապերով, կարծում է Ֆրանսիայում բնակվող հայտնի իսրայելցի ռեժիսոր Ամոս Գիտայը:
«Երկու ժողովուրդների առջև կանգնած է ինքնության և իր տարածքի համար պայքարի խնդիրը», - ասաց Գիտայը Երևանի «Ոսկե ծիրան» XI միջազգային կինոփառատոնի շրջանակում կազմակերպված մամուլի ասուլիսի ժամանակ:
Փառատոնի ընթացքում նախատեսվում է ներկայացնել ռեժիսորի 4 ֆիլմերի հետահայաց ցուցադրությունները՝ «Սահմանը» եռապատումը, որը ներառում է «Ավետյաց երկիր, «Ազատ գոտի» և «Սահմանազատում» ֆիլմերը, ինչպես նաև նրա վերջին ֆիլմը՝ «Անա Արաբիան»:
Գիտայն ընդգծեց, որ սա իր առաջին այցն է Հայաստան, ինչի համար նա շատ ուրախ է, քանի որ արդեն երկար ժամանակ աջակցում է հայ ժողովրդին Ցեղասպանության ճանաչման համար մղվող պայքարում` այս հանցանքի համար պատասխանատուները պետք է ընդունեն իրենց մեղքը:
Հայ ժողովրդի պատմության, ինչպես նաև Հայաստանի մասին առաջին տեղեկությունները, ռեժիսորի խոսքով, ինքը ստացել է իր հայ ընկերներից` հայտնի կինոգործիչներ Ատոմ Էգոյանից և Ռոբեր Գեդիկյանից, և դրանք այդ երկիր այցելելու ցանկություն առաջացրին իր մեջ։-0-
