ԵՐԵՎԱՆ, 20 հունիսի. /Նովոստի-Արմենիա/. Աշխարհահռչակ հարավկորեացի ռեժիսոր Կիմ Կի-Դուկը և մի շարք ակնառու կինոգործիչներ կդառնան «Ոսկե ծիրան» երևանյան XI միջազգային կինոփառատոնի պատվավոր հյուրերը: Կինոփառատոնը կանցկացվի հուլիսի 13-20-ը Երևանում, ասաց փառատոնի ծրագրերի տնօրեն Միքայել Ստամբոլցյանը:
«Փառատոնի «Հետահայաց ցուցադրություններ» ծրագրի շրջանակներում մենք մտադիր ենք ցուցադրել հինգ հայտնի ռեժիսորների, այդ թվում նաև հարավկորեացի ռեժիսոր Կիմ Կի-Դուկի ֆիլմերը, ով Երևան կգա երկու օրով և ներկա կլինի իր ֆիլմի ցուցադրությանը: Ընդհանուր առմամբ մենք, նրա համաձայնությամբ, ընտրել ենք նրա ֆիլմերից տասը», - ասաց Ստամբոլցյանն ուրբաթ մամուլի ասուլիսի ժամանակ:
Նրա խոսքերով՝ հետահայաց ցուցադրությունների շրջանակներում կներկայացվեն նաև հայտնի չինացի ռեժիսոր Ցզյա Չժանկեի յոթ ֆիլմերը:
«Չժանկեն ամենահայտնի չինացի ռեժիսորներից է: Նրա ֆիլմը նախորդ տարի ներառվել էր մեր մրցութային ծրագրում, իսկ այս տարի ռեժիսորը Կաննի փառատոնի գլխավոր ժյուրիի անդամ էր: «Ոսկե ծիրանի» շրջանակներում մենք կներկայացնենք Չժանկեի 7-8 ֆիլմերը», - ասաց Ստամբոլցյանը:
Նրա խոսքերով՝ փառատոնի նշանակալի իրադարձություն կդառնա նաև իսրայելցի ռեժիսոր Ամոս Գիտայի ներկայությունը և նրա չորս ֆիլմերի ցուցադրությունը:
«Ոսկե ծիրան» փառատոնի ծրագրերի տնօրենն ավելացրեց նաև, որ Երևան է հրավիրված նաև հայտնի ֆրանսաբնակ, ազգությամբ վրացի ռեժիսոր Օթար Իոսելիանին, ում ֆիլմերը կցուցադրվեն «Հարգանքի օր» ծրագրի շրջանակներում՝ նրա 80-ամյակի պատվին:
«Ոսկե ծիրան» XI կինոփառատոնը կնվիրվի Սերգեյ Փարաջանովի հիշատակին, ով այս տարի կդառնար 90 տարեկան։ «Ոսկե ծիրան» XI փառատոնի բացման պաշտոնական արարողությունը տեղի կունենա հուլիսի 13–ին Օպերայի և բալետի ազգային ակադեմիական թատրոնում։
«Ոսկե ծիրանի» շրջանակում ցուցադրվող բոլոր ֆիլմերի ամբողջական ցանկը տեղադրված է փառատոնի պաշտոնական կայքում:
«Նովոստի–Արմենիա» գործակալությունը փառատոնի տեղեկատվական հովանավորն է։
«Ոսկե ծիրան» փառատոնն անցկացվում է Երևանում 2004 թ.–ից և համարվում է տարածաշրջանի ամենահեղինակավոր փառատոներից մեկը։ Այն կազմակերպվում է ՀՀ մշակույթի նախարարության և Վիվասել–ՄՏՍ ընկերության աջակցությամբ։ Փառատոնի անցկացման տարբեր տարիներին Երևան են այցելել աշխարհահռչակ դերասաններ և ռեժիսորներ, որոնց թվում են գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։ 2010 թ.–ին կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին։–0–
