Շառլ Ազնավուրի 90-ամյակին նվիրված համերգ կկայանա հունիսի 20-ին Երևանում

ԵՐԵՎԱՆ, 19 հունիսի. /Նովոստի-Արմենիա/. «Ժամանակակիցը» խորագրով համերգը` նվիրված աշխարհահռչակ շանսոնիե Շառլ Ազնավուրի 90-ամյակին, տեղի կունենա հունիսի 20-ին Երևանի Կոմիտասի անվան կամերային երաժշտության տանը։

Ինչպես հաղորդում է համերգի կազմակերպիչ «Նարեկացի» արվեստի միությունը,  համերգի ընթացքում «Նարեկացի» համույթը հանդես կգա ինքնատիպ համերգային ծրագրով՝ կներկայացնի Ազնավուրի ստեղծագործությունները` փոխադրված ազգային նվագարանների համար:

Հուլիսի 25-27-ին Նարեկացի համույթը նույն համերգային ծրագրով հանդես կգա նաև Արցախում, մասնավորապես Շուշիում, Ստեփանակերտում և Բերձորում:

Շառլ Ազնավուրը (իսկական անունն է Շահնուր Վաղինակ Ազնավուրյան (Shahnour Varenagh Aznavurjian)) ծնվել է 1924թ. մայիսի 22-ին՝ Փարիզում՝ հայ գաղթյալների ընտանիքում։Ազնավուրը ստեղծել է մոտ 1000 երգ, նկարահանվել 60 ֆիլմերում և վաճառել ավելի քան 100 մլն ձայնասկավառակ։ TIME և CNN հանդեսի համատեղ հարցման համաձայն, Ազնավուրը ճանաչվել է XX դարի լավագույն էստրադային կատարողը։

Նրա հայտնի երգերից են` «Բոհեմը», «Դեռ երեկ», «Երիտասարդություն», «Պետք է գիտնալ», «Նա», «Մամա», «Երկու կիթառ», «Ինչպես ասում են», «Հավերժական սեր», «Ավե Մարիա» և այլն։ Դրանց կատարողներից են՝ Էդիտ Պիաֆը, Լայզա Մինելլին, Պլասիդո Դոմինգոն, Ռեյ Չարլզը, Խուլիո Իգլեսիասը և այլոք։--0--