ԵՐԵՎԱՆ, 16 հունիսի. /Նովոստի–Արմենիա/. Հայաստանի վաստակավոր արտիստ Իրինա Հարությունյանի բեմադրած «6 ուտեստ՝ օլիգարխի համար» կատակերգական ներկայացման պրեմիերան կկայանա հունիսի 17–ին Հովհաննես Թումանյանի պետական տիկնիկային թատրոնի բեմում, հայտնում է «ԱՌԿԱ-Style»–ը։
Ինչպես հայտնեց ներկայացման բեմադրիչ և գեղարվեստական ղեկավար Իրինա Հարությունյանը, «Վեց ուտեստ՝ օլիգարխի համար» ներկայացման հիմքում ընկած է հայտնի հայ ռեժիսոր Հենրիխ Հովհաննիսյանի դստեր` Գաննա Սլուցկիի «1 հավից 6 ուտեստ» պիեսը, որը հաջողությամբ ցուցադրվել էր ինչպես Հայաստանում, այնպես էլ արտերկրում։
«Մենք հեղինակի հետ համաձայնեցրել ենք նոր անվանումը և, ընդհանուր առմամբ, բեմադրությունը։ Ներկայացման մեջ ընդգրկված են հայ սիրված դերասաններ, ովքեր հիմնականում հայտնի են Երևանի Ստանիսլավսկու անվան պետական ռուսական դրամատիկական թատրոնի աշխատանքներով»,– ասաց Հարությունյանը։
Դերասանուհին հայտնեց, որ սյուժեն շատ արդիական է, հերոսները` վառ, իրավիճակները` սուր և հումորային: Ներկայացման հիմնական գաղափարը գլխավոր հերոսի մեծ սերն է, որը բախվում է որդու համար արժանի կին փնտրելու մոր անհագուրդ ձգտումներին։
«Անշուշտ, իր երեխայի մասին մոր չափազանց հավատարմության և հոգատարության թեման մոտ է մեր հասարակությանը։ Որպես «վեց ուտեստներ» հանդես կգան հարսնացուները, ում մայրը կներկայացնի իր որդուն`բեմադրության գլխավոր հերոսին»,– ասաց Հարությունյանը, ավելացնելով, որ բեմադրությունը կուղեկցվի պրոֆեսիոնալ պարերով։
Ներկայացման պրոդյուսեր Արտյոմ Կարապետյանն իր հերթին նշեց, որ «Վեց ուտեստ օլիգարխի համար»–ը կդառնա թատերական տարբեր ժանրերի միախառնում։
«Այս անգամ ներկայացումը կցուցադրվի ռուսերեն, բայց ծրագրում ենք առաջիկայում անցկացնել այն նաև հայերեն։ Բեմադրությունը շատ դինամիկ է, ակտիվ և մյուզիքլի տարրեր ունի»,– ասաց Կարապետյանը։
Նա ավելացրեց նաև, որ թեև ներկայացման մեջ չկան «16+» տեսարաններ, այնուամենայնիվ բեմադրությունն իմաստային ընկալման տեսանկյունից ավելի համապատասխանում է մեծահասականերին։
Ներկայացման գլխավոր դերակատար Յուրի Իգիթխանյանի խոսքով` դերասանական կազմն անհամբերությամբ և հուզմունքով է սպասում պրեմիերային։ «Դերասաններից շատերը բեմում են եղել մի քանի տարի»,– ավելացրեց նա։
Դերասանական կազմում ընդգրկված են փորձառու և ճանաչված դերասաններ` Յուրի Իգիթխանյանը, Յուլիա Ֆինկը, Անուշ Բրուտյանը, Յանա Գաբրիելյանը, Ելենա Սարգսյանն ու Տաթև Մելքոնյանը:
Բեմադրությունը Իրինա Հարությունյանի հիմնած «VIVARTE production» թատերախմբի դեբյուտային աշխատանքն է։ Ներկայացումը կանցնի հունիսի 17–ին, 18–ին, 24–ին և 25–ին։ -0-
