Աշխարհահռչակ տենոր Ռոբերտինո Լորետտին հունիսի 19–ին ելույթ կունենա ԼՂՀ–ում

ԵՐԵՎԱՆ, 16 հունիսի. /Նովոստի–Արմենիա/. Աշխարհահռչակ տենոր Ռոբերտինո Լորետտին հունիսի 19–ին ելույթ կունենա ԼՂՀ–ում, «Նովոստի–Արմենիա» գործակալությանը տեղեկացրեցին ԼՂՀ մշակույթի նախարարությունից։

«Համերգը տեղի կունենա ԼՂՀ–ի մայրաքաղաք Ստեփանակերտում», – տեղեկացրել են գերատեսչությունից։

Համերգի համակազմակերպիչ «Կադանս» հայկական մշակութային կենտրոնի տնօրեն Նիկա Բաբայանը գործակալությանը տեղեկացրեց, որ Լորետտին համերգի ժամանակ ելույթ կունենա իր դաշնակահար Ֆաբրիցիո Մասիի և աշակերտի` տասներկուամյա Ֆելիքս Քարամյանի հետ։

«Ֆելիքս Քարամյանը բնակվում է Նիժնի Նովգորոդում, սակայն արմատներով ԼՂՀ–ից է, այդ պատճառով նա շատ էր ցանկանում ելույթ ունենալ ԼՂՀ–ում», – ավելացրեց նա։

Բաբայանը նաև նշեց, որ Լորետտին, ով առաջին անգամ է այցելելու Ղարաբաղ, տեղյակ է, որ ԼՂՀ այցելելուց հետո իր անունը կհայտնվի Բաքվի «սև ցուցակում», և ինքը կարող է զրկվել Ադրբեջանում ելույթ ունենալու հնարավորությունից, սակայն նման հեռանկարը տենորին չի վախեցնում։

«Լորետտին ասաց, որ եթե իրեն որևէ մի երկրում արգելեն համերգ տալ, ապա ինքը չի ցանկանա այդ երկրի հետ գործ ունենալ»,  – նշեց Բաբայանը

Համերգի համակազմակերպիչը նաև նշեց, որ չնայած մեծ զբաղվածությանը` աշխարհահռչակ երգիչը ԼՂՀ այցելելու անկեղծ ցանկություն է հայտնել։

Օտարերկրացիների «սև ցուցակում», որոնց արգելված է մտնել Ադրբեջան, ներառվում են այն անձինք, ովքեր այցելել են ԼՂՀ առանց ադրբեջանական իշխանությունների հետ համաձայնության։ Այդ ցուցակը հրապարակվել է Ադրբեջանի ԱԳՆ–ի կողմից 2013 թ.–ի ամռանը։ Ցուցակումը 320 մարդ է ընդգրկված։–0–