Հայտնի շվեյցարացի դիրիժոր և դաշնակահար Միխայել Վենդեբերգը երկու համերգ կունենա Երևանում

ԵՐԵՎԱՆ,16 հունիսի. /Նովոստի–Արմենիա/. Հայտնի շվեյցարացի դիրիժոր և դաշնակահար Միխայել Վենդեբերգը երկու համերգ կունենա Ա. Սպենդիարյանի անվան օպերայի և բալետի ազգային ակադեմիական թատրոնում, «Նովոստի–Արմենիա» գործակալությանը տեղեկացրեց թատրոնի հասարակայնության հետ կապերի համակարգող Թերեզա Բարսեղյանը։

«Հունիսի 19–ին նախատեսված առաջին համերգի ժամանակ Վենդեբերգը հանդես կգա որպես դիրիժոր, ներկայացվելու է  Ջ. Վերդիի «Տրավիատա» օպերան՝ 4 գործողությամբ: Գլխավոր պարտիաները կկատարեն Արծվիկ Դեմուրչյանը, Պերճ Քարազյանը և Հայաստանի վաստակավոր արտիստ Առնոլդ Քոչարյանը», – ասաց Բարսեղյանը։

Օպերայի ռեժիսորներ է Հայաստանի ժողովրդական արտիստ Գեղամ Գրիգորյանը, նկարիչն է Հայաստանի վաստակավոր նկարիչ Ավետիս Բարսեղյանը, երգչախմբի ղեկավարն է Զոյա Կարապետյանը։ Երաժշտական ղեկավար և գլխավոր դիրիժորն է Կարեն Դուրգարյանը։

«Երաժշտի երկրորդ ելույթը տեղի կունենա հունիսի 22–ին։ Այդ երեկո թատրոնում «Համերգ ճեմասրահում» նախագծի շրջանակներում Վենդերբերգը կամերային երաժշտություն կներկայացնի», – ասաց Բարսեղյանը։

Համերգի ժամանակ մաեստրոն կկատարի Մոցարտի դաշնամուրի և փողային գործիքների կվինտետը և Բրամսի դաշնամուրի և լարային քառյակի N 34 կվինտետը։ Մուտքը` երեկոյան զգեստներով։
Երաժշտական ղեկավարն է Կարեն Դուրգարյանը, նախագհի հեղինակը Շմավոն Գրիգորյանն է։

Դիրիժոր և դաշնակահար Միխայել Վենդեբերգը ծնվել է 1974 թ.–ին Գերմանիայում։ Նա եղել է այնպիսի նվագախմբերի խմբավարը, ինչպիսիք են Բեռլինի պետական կապելլան, «Մուզիկֆաբրիկ Քյոլնը», Շտուտգարդի «Նոր ոկալ մենակատարներ» և շվեյցարական «Contrechamps» անսամբլները, Բեռլինի պետական օպերային թատրոնի «Appoloni et Musis» կամերային երգչախումբը, ինչպես նաև Ցյուրիխի «Collegium Novum» համույթը

2011 թ.–ից Վենդեբերգը Լյուցեռնի թատրոնի դիրիժորն ու երաժշտական ղեկավարի տեղակալն է, իսկ այժմ նա նաև «Contrechamps» համույթի երաժշտական ղեկավարն է։–0–