Վախթանգ Կիկաբիձեն Երևանում ներկայացրել է իր «Նրանք» նոր գիրքը

ԵՐԵՎԱՆ, 9 հունիսի. /Նովոստի–Արմենիա/. Խորհրդային և վրացի էստրադային երգիչ և դերասան Վախթանգ Կիկաբիձեն Երևանում տեղեկացրել է, որ շուտով լույս կտեսնի իր «Նրանք» նոր գիրքը։

Ավելի վաղ, ինչպես նշում է արտիստը, գիրքը կոչվում էր «Կովկասյան ազգության անձինք», սակայն հեղինակը որոշել է, որ այդ անվանումը դուր չի գա ոչ ռուսներին, ոչ կովկասցիներին։
«Գիրքը պատմում է արտասովոր մարդկանց մասին, այլ ազգության մարդկանց մասին, ովքեր կյանքում շրջապատել են ինձ, այն պատմությունների մասին է, որոնք շատերին հետաքրքիր կլինեն, մարդկանց մասին, որոնց հասարակությունում «սպիտակ» ագռավ են կոչում», – ասել է Կիկաբիձեն երկուշաբթի «Mezzo» ակումբում տեղի ունեցած մամուլի ասուլիսի ժամանակ։

75–ամյակի տոնակատարության շրջանակներում Կիկաբիձեն երկու համերգ կունենա Երևանում։ Համերգները տեղի կունենան հունիսի 9–ին Գ. Սունդուկյանի անվան ազգային ակադեմիական թատրոնում և «Mezzo» ակումբում։

Համերգները կկայանան «Իմ տարիները իմ հարստությունն են» խորագրով։

Վախթանգ Կիկաբիձեն էստրադային երգիչ է, դերասան, սցենարիստ, կինոռեժիսոր, երգերի հեղինակ։ Նա Վրաստանի ԽՍՀ ժողովրդական արտիստ է (1980), ԽՍՀՄ պետական մրցանակի դափնեկիր (1978), ինչպես նաև Վրաստանի պետական մրցանակի դափնեկիր (2013)։

Կինոյում մարմնավորել է բազմաթիվ կերպարներ, որոնք սիրվել են ժողովրդի կողմից։ Այդ ֆիլմերից են` «Մի վշտացիր», «Միմինո» և «Ֆորտունա», որոնք նկարահանվել են ռեժիսոր Գեորգի Դանելիայի կողմից, ինչպես նաև «Վերայի թաղամասի մեղեդիները»,  «Լրիվ անհույսը» և «ՏԱՍՍ–ը լիազորված է հայտարարել» ֆիլմերը։

Կիկաբիձեի երգացանկում կան բազմաթիվ հայտնի երգեր («Չիտո գրիտո», «Իմ տարիները իմ հարստությունն են» և այլն)։Կիկաբիձեն միշտ հյուրախաղեր է ունենում։ Նա համերգներով եղել է բոլոր հինգ մայրցամաքներում։–0–