Ֆրանսիայի նախկին առաջին տիկին Կառլա Բրունին հանդես կգա մենահամերգով Մոսկվայում

ԵՐԵՎԱՆ, 2 հունիսի. /Նովոստի–Արմենիա/. Ֆրանսիայի նախկին առաջին տիկին Կառլա Բրունի–Սարկոզին առաջին անգամ մենահամերգով ելույթ կունենա Մոսկվայում, հաղորդում է «ՌԻԱ Նովոստին»։

Համերգը տեղի կունենա երկուշաբթի Մոսկվայի երաժշտության տան Սվետլանովյան սրահում։

Բրունին արժանացել է Ֆրանսիայի ձայնագրման ինդուստրիայի բարձրագույն` «Տարվա լավագույն երգչուհի» տիտղոսին։ Ֆրանսիայի նախկին առաջին տիկինը սկսել է երաժշտությամբ զբաղվել 29 տարեկանում` թոփ–մոդելի կարիերայի գագաթնակետում` վաստակելով 7,5 մլն դոլար, որն այն ժամանակ ռեկորդային ցուցանիշ էր։ 2003 թ.–ին նա թողարկել է «Ինչ–որ մեկն ինձ ասել է» դեբյուտային ալբոմը, որը միայն Ֆրանսիայում վաճառվել է 800 հազար օրինակով։

Ժամանակակից ֆրանսիական շանսոնի ոգով լիրիկական մեղեդին Բրունիի ֆիրմային նշանն է։ Նրա երգերն առաջին դեմքից ներկայացվող սիրո պատմություններ են։ Բրունին իր բոլոր ստեղծագործությունների հեղինակն է։

2007 թ.–ին թոփ–մոդել Բրունին ծանոթացել է Նիկոլա Սարկոզիի հետ, ով այն ժամանակ զբաղեցնում էր Ֆրանսիայի նախագահի պաշտոնը։ 2008 թ.–ի հունվարի 8–ին զույգն ամուսնացավ Ելիսեյան պալատում։ Բրունին Սարկոզիի երրորդ կինն է։ 2011 թ.–ին զույգը դուստր ունեցավ, որին անվանակոչեցին Ջուլիա։ Լինելով առաջին տիկին` Բրունին շարունակեց զբաղվել երաժշտությամբ։–0–