Երևանում առաջին անգամ բացվել է աշխարհահռչակ դիզայներ Մայքլ Արամի ցուցահանդեսը

ԵՐԵՎԱՆ, 26 մայիսի. /Նովոստի–Արմենիա/. Երևանում առաջին անգամ բացվել է աշխարհահռչակ դիզայներ Մայքլ Արամի ցուցահանդեսը։ Միջոցառումը նվիրված է վարպետի ստեղծագործական գործունեության 25–ամյակին։

Մայքլ Արամի մետաղական դեկորատիվ աշխատանքների ցուցահանդեսը բացվել է մայիսի 26-ին և կտևի մինչև մայիսի 28–ը։ Ցուցահանդեսում ներկայացված են և՛ խոշոր քանդակները, և՛ ոչ մեծ իրեր` սկուտեղներ, ափսեներ։ Ցուցահանդեսն անցնում է Հայաստանի սփյուռքի նախարարության հովանու ներքո։

«Արդեն 25 տարի է` Մայքլ Արամը զբաղվում է աշխարհում հայկական արվեստի քարոզչությամբ։ Թվերն անչափ խոսուն են` նրա աշխատանքները ներկայացվել են աշխարհի 600 մասնագիտացված խանութներում»,– ասաց Սփյուռքի նախարար Հրանուշ Հակոբյանը։

Ըստ նրա, Մայքլ Արամի` հիմնականում բուն հայկական խորհրդանիշներ ընդգրկող ստեղծագործությանը ծանոթացած ցանկացած մարդ սկսում է հետաքրքրվել նաև Հայաստանի պատմությամբ, նրա մշակութային արժեքներով։

Հակոբյանը վարպետին պարգևատրեց Հայաստանի սփյուռքի նախարարության մեդալով։ Նշանավոր դիզայներն իր հերթին Սփյուռքի նախարարությանը նվիրաբերեց իր երկու աշխատանքները։

Մայքլ Արամը հայտնեց, որ իր համար մեծ պատիվ է առաջին անգամ Հայաստանում ներկայացնել իր աշխատանքները։

«Թեև ես մեծացել եմ Ամերիկայում, ուր Արևմտյան Հայաստանից տեղափոխվել են իմ պապերը, հայկական ինքնությունը միշտ վառ կերպով է դրսևորվել մեր ընտանիքում, և ես մեծացել եմ հայկական միջավայրում։ Որպես դիզայներ կարծում եմ, որ ինձ ավելի լավ կներկայացնեն իմ ստեղծագործությունները»,– ասաց նա ցուցահանդեսի բացմանը։

Մայքլ Արամն աշխարհահռչակ դիզայներ է, նրա ստեղծագործությունները ցուցադրվում եմ աշխարհի տարբեր թանգարաններում։ Դրա բազմաթիվ հեղինակավոր պարգևներից է 2011 թվականին ստացած «Ellis Island» շքանշանը` ԱՄՆ–ի մշակույթի մեջ ներդրած զգալի ավանդի համար։ Մայքլ Արամը զբաղվում է բարեգործությամբ` «Հայկական մանկական հիմնադրամի», «ԹՈՒՄՈ» ստեղծարար տեխնոլոգիաների կենտրոնի տնօրենների խորհրդի անդամ է։ -0-