ԵՐԵՎԱՆ, 6 մայիսի. /Նովոստի–Արմենիա/. Ֆրանսահայ լեգենդար շանսոնիե Շառլ Ազնավուրը Facebook սոցցանցի իր պաշտոնական էջում աջակցության խոսք է ուղղել Եվրատեսիլ 2014–ին Հայաստանի ներկայացուցիչ Արամ MP3–ին (Արամ Սարգսյան)։
«Դուք պատրաստվում եք անցնել «Եվրատեսիլ» կոչվող արկածի միջով։ Դուք, ինչպես ինձ թվում է, լավ թեկնածու եք, ով կարող է ներկայացնել Հայաստանը։ Վստահ եմ, որ բացի Հայաստանի բնակչությունից, Ձեզ համար կերկրպագի աշխարհի բոլոր ծայրերում ապրող ամբողջ Սփյուռքը»,– գրել է Ազնավուրը երեքշաբթի։
Նա նշել է, որ սփյուռքահայությունը մրցույթների ժամանակ սրտատրոփ հետևելու է հայ երգչի կատարմանը, աղոթելու է և ջերմորեն սատարելու, ինչպես նաև «հպարտանալու, որ այսպիսի տղա ունենք»։
Ազնավուրն Արամ MP3–ն մաղթել է հաջողություն և խոստացել իր ընտանիքի հետ միասին «մատները խաչել», որ հայ երգիչը հավաքի քվեների անհրաժեշտ քանակը։
«Եվրատեսիլ-2014» մրցույթը կկայանա Կոպենհագենում այս տարվա մայիսին։ Եվրաշոուի բոլոր կիսաեզրափակիչները և եզրափակիչը կանցնեն Refshaleoen–ի B&W Hallerne բեմում։ Մրցույթի կիսաեզրափակիչները կկայանան մայիսի 6—ին և 8–ին, իսկ եզրափակիչ շոուն` մայիսի 10–ին։
2014 թվականին մրցույթին կմասնակցի 37 երկիր։ Առաջին կիսաեզրափակչում, որը կկայանա մայիսի 6–ին, ելույթ կունենան 16 երկրներ, իսկ երկրորդ կիսաեզրափակչին կմասնակցեն 15 երկրներ։
Հայ երգիչ և շոումեն Արամ MP3–ը Եվրատեսիլ-2014 երգի միջազգային մրցույթում, հանդես կգա առաջին կիսաեզրափակչում մայիսի 6–ին` առաջին համարի ներքո։ Հայաստանի հետ միասին առաջին կիսաեզրափակչում ելույթ կունենան Ռուսաստանը, Շվեդիան, Ալբանիան, Իսլանդիան, Լատվիան, Ադրբեջանը և Էստոնիան, իսկ երկրորդ մասին կմասնակցեն Բելգիան, Հունգարիան, Մոլդովան, Չեռնոգորիան, Սան–Մարինոն, Պորտուգալիան, Ուկրաինան և Նիդեռլանդները։
Երկու կիսաեզրափակիչների տասական մասնակիցներ եզրափակչում կպայքարեն «մեծ հնգյակի» երկրների ներկայացուցիչների հետ (Իսպանիա, Գերմանիա, Իտալիա, Մեծ Բրիտանիա, Ֆրանսիա), ինչպես նաև ընդունող երկրի` Դանիայի ներկայացուցչի հետ։
Կոպենհագենն արդեն երկու անգամ ընդունել է մրցույթը` 1964 և 2001 թթ.–ին, իսկ 2005 թ.–ին այնտեղ անցկացվել են «Եվրատեսիլի» 50–ամյակին նվիրված տոնակատարությունները։
Հայաստանը մասնակցում է «Եվրատեսիլ» մրցույթին` սկսած 2006 թվականից։ 2008 թվականին լավագույն արդյունքը ցույց տվեց Սիրուշոն` զբաղեցնելով չորրորդ տեղը։
2013թ.–ին Հայաստանը ներկայացրեց Dorians ռոք խումբը, որը Շվեդիայի Մալմո քաղաքում տեղի ունեցած «Եվրատեսիլ–2013» երգի մրցույթի ժամանակ «Lonely Planet» երգով զբաղեցրեց 18–րդ տեղը։–0-
