Երևանի «Ոսկե ծիրան» կինոփառատոնին մասնակցության հայտեր են ուղարկել ավելի քան 1500 մասնակիցներ ողջ աշխարհից. ծրագրերի տնօրեն

ԵՐԵՎԱՆ, 6 մայիսի. /Նովոստի-Արմենիա/.  «Ոսկե ծիրան» երևանյան կինոփառատոնի մասնակցության հայտեր են ուղարկել ավելի քան 1500 մասնակիցներ ողջ աշխարհից, երեքշաբթի լրագրողներին հայտնեց փառատոնի ծրագրերի տնօրեն Միքայել Ստամբոլցյանը։

«Մենք արդեն դադարել ենք զարմանալ երկրների քանակից, որտեղից հայտեր ենք ստանում, որովհետև դրանք շատ–շատ են։ Մեզ դիմում են նույնիսկ ամենաէկզոտիկ երկրներից»,– ասաց Ստամբոլցյանը Հայաստանի մշակույթի նախարարությունում կայացած մամուլի ասուլիսում։

Սակայն, ըստ նրա, կազմակերպիչներին, այնուամենայնիվ, զարմացրեց այն փաստը, որ այս տարի հայտերի թվով ռեկորդակիր է Գերմանիան, որտեղից 141 դիմում է ստացվել։ Երկրորդ տեղում 120 հայտերով Ռուսաստանն է։ Այնուհետև Իտալիան, Ֆրանսիան, Իրանը և Հայաստանը, որն առայժմ ինը ֆիլմ է ներկայացրել։

Ստամբոլցյանը նշեց նաև, որ հայտերի ընդունումը դեռևս շարունակվում է, այդ պատճառով թվերը դեռևս կարող են փոխվել։

Նման ցուցանիշները, կինոփառատոնի գեղարվեստական տնօրեն Սուսաննա Հարությունյանի կարծիքով, վկայում է այն մասին, որ աշխարհում չկա կինոարտադրությամբ զբաղվող մի երկիր, որտեղ չիմանան Հայաստանի մասին։ «Դա շատ կարևոր է, քանի որ մենք իսկապես ամրապնդվել ենք համաշխարհային կինեմատոգրաֆի քարտեզի վրա և վստահ ներկայանում ենք աշխարհին»,– ասաց նա։

«Ոսկե ծիրանի» տնօրեն Հարություն Խաչատրյանը նշեց, որ ամեն անգամ ներկայացուցիչներին թվում է, թե հայտերի թիվն արդեն չի աճի։ «Սակայն տարեցտարի ավելանում է ոչ միայն փառատոնին մասնակցել ցանկացողների թիվը, այլ նաև ընդլայնվում է աշխարհագրությունը և շահագրգռված զբոսաշրջիկների թիվը»,– ասաց Խաչատրյանը։ Նա կատակով ավելացրեց, որ փառատոնի և դրա կազմակերպիչների համար մրցանակ է սահմանված Հայաստանի զբոսաշրջային գերատեսչություններից երկրի զբոսաշրջության զարգացման համար, քանի որ հյուրերի մեծ հոսք է նկատվում դեպի մայրաքաղաք հուլիսին` փառատոնի ամենաբուռն պահին, ֆիլմեր դիտելու և հյուրերի հետ շփվելու համար։

Համաձայնելով Սուսաննա Հարությունյանի հետ համաշխարհային ֆիլմերի տարածման անհրաժեշտության հարցում` Խաչատրյանը նշեց ամբողջ աշխարհում հայկական ֆիլմերի ցուցադրություններ կազմակերպելու անհրաժեշտությունը, «քանի որ յուրաքանչյուր ֆիլմ, որը ցուցադրվում է աշխարհի տարբեր ծայրերում, հսկայական քարոզչություն է Հայաստանի համար»։

«Ոսկե ծիրան» տասնմեկերորդ փառատոնի բացման հանդիսավոր արարողությունը կկայանա հուլիսի 13–ին Օպերայի և բալետի ազգային ակադեմիական թատրոնում։ Այն կտևի մինչև հուլիսի 20–ը։

Այս տարի կինոփառատոնը նվիրված կլինի Փարաջանովի հիշատակին։

«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչվածներից մեկը: «Ոսկե ծիրան» ամենամյա միջազգային կինոփառատոնը ամենահեղինակավորներից մեկն է տարածաշրջանում: 2010թ.-ին փառատոնը արժանացել է Կինոյի միջազգային միության, « Ficts Plate D’honneur 2010» հեռուստատեսության և սպորտի գլխավոր մրցանակին: Այս տարիներին Երևան են այցելել աշխարհահռչակ դերասաններ և ռեժիսորներ, որոնց թվում` գրող և սցենարիստ Տոնինո Գուերան, հանրաճանաչ դերասանուհիներ Կլաուդիա Կարդինալեն և Ֆանի Արդանը։ --0—