ԵՐԵՎԱՆ, 6 մայիսի. /Նովոստի–Արմենիա/. «Ոսկե ծիրան» երևանյան տասնմեկերորդ կինոփառատոնի պատվավոր հյուրեր կլինեն ժամանակակից ռեժիսուրայի դասականները, երեքշաբթի լրագրողներին հայտնեց կինոփառատոնի տնօրեն Հարություն Խաչատրյանը։
«Փառատոնի շրջանակներում մենք սովորաբար հրավիրում ենք ամենահայտնի ռեժիսորների, ոչ թե դերասանների, քանի որ մեր փառատոնը ռեժիսորների փառատոն է։ Այս տարի, ինչպես միշտ, մեզ մոտ շատ անվանի հյուրեր կլինեն, ժամանակակից ռեժիսուրայի դասականներ, ովքեր նաև վարպետության դասեր անցկացնեն Երևանում»,– ասաց Խաչատրյանը Հայաստանի մշակույթի նախարարությունում կայացած մամուլի ասուլիսում։
Փառատոնի տնօրենը միաժամանակ չհրապարակեց փառատոնի հատուկ հյուրերի անունները` համոզմունք հայտնելով, որ կինոսիրողներին նրանք չեն հիասթափեցնի։ «Ոսկե ծիրանի» մանրամասները չբացեց նաև ծրագրերի տնօրեն Միքայել Ստամբոլցյանը։ Նա ասաց միայն, որ աստղերը մի քանիսն են լինելու։
Հայաստանի մշակույթի նախարար Հասմիկ Պողոսյանն իր հերթին «Ոսկե ծիրանն» անվանեց հանրապետության ամենասպասվող և վառ մշակութային իրադարձությունը։
«Որպես մշակույթի նախարար` ես շատ բարձր եմ գնահատում այդ փառատոնի անցկացումը մեր երկրում, քանի որ կարծում եմ, որ այն լուծում է ամենատարբեր խնդիրներ»,– ասաց Պողոսյանը։ Նրա խոսքով` փառատոնի կազմակերպիչները կարողացել են ստեղծել մի նախագիծ, որը վաղուց արդեն դուրս է եկել միայն մեկ մշակույթի շրջանակներից։
Փառատոնի շնորհիվ, նախարարի խոսքով, համաշխարհային կինեմատոգրաֆի լավագույն ժապավենները հասանելի են դարձել հայ հանդիսատեսին։ Այդ առիթով նա հատուկ նշեց հետահայաց ցուցադրությունների և աշխարհի ամենահեղինակավոր փառատոներում հաղթած ֆիլմերի պրեմիերաների դերը։
«Շատ կարևոր է նաև, որ փառատոնը հատուկ ուշադրություն է դարձնում երիտասարդությանը, և «Ծիրանի կորիզը», թերևս, փառատոնի կարևորագույն տարրերից է, քանի որ դրանում գնահատվում է երիտասարդ կինեմատոգրաֆիստների աշխատանքը»,– նշեց Պողոսյանը։
Նա ավելացրեց նաև, որ փառատոնային օրերին Երևանը վերափոխվում է, լցվում տոնական տրամադրությամբ և բազմաթիվ հայ ու օտարերկրյա հյուրեր է ընդունում։
«Ոսկե ծիրան» տասնմեկերորդ փառատոնի բացման հանդիսավոր արարողությունը կկայանա հուլիսի 13–ին Օպերայի և բալետի ազգային ակադեմիական թատրոնում։ Այն կտևի մինչև հուլիսի 20–ը։
Այս տարի կինոփառատոնը նվիրված կլինի Փարաջանովի հիշատակին։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչվածներից մեկը: «Ոսկե ծիրան» ամենամյա միջազգային կինոփառատոնը ամենահեղինակավորներից մեկն է տարածաշրջանում: 2010թ.-ին փառատոնը արժանացել է Կինոյի միջազգային միության, « Ficts Plate D’honneur 2010» հեռուստատեսության և սպորտի գլխավոր մրցանակին: Այս տարիներին Երևան են այցելել աշխարհահռչակ դերասաններ և ռեժիսորներ, որոնց թվում` գրող և սցենարիստ Տոնինո Գուերան, հանրաճանաչ դերասանուհիներ Կլաուդիա Կարդինալեն և Ֆանի Արդանը։ --0—
