ԵՐԵՎԱՆ, 25 ապրիլի. /Նովոստի–Արմենիա/. Ռեժիսորներ Արեգ Ազատյանի և Շողիկ Թադևոսյանի «Ռոմանտիկները» գեղարվեստական ֆիլմի երևանյան պրեմիերան կկայանա ապրիլի 25–ին «Մոսկվա» կինոթատրոնում։
«Ֆիլմը պատմում է ժամանակակից իրականության մասին ի դեմս երկու երիտասարդների, որոնցից մեկը երկընտրանքի առջև կանգնած երիտասարդ է` մնալ հայրենիքում, թե՞ մեկնել ԱՄՆ։ Ֆիլմը պատմում է ժամանակակից հայ երիտասարդության մասին, անդրադառնում է այնպիսի հարցերի, ինչպիսին է միգրացիան, գործազրկությունը և Հայոց ցեղասպանությունը»,– ուրբաթ հրավիրված ասուլիսի ժամանակ ասաց Արեգ Ազատյանը։
Ըստ նրա, ԱՄՆ–մեկնելուց առաջ գլխավոր հերոսի ընկերները նրա համար երեկույթ են կազմակերպում, որը ողբերգական ավարտ է ունենում։
Ազատյանը հայտնեց, որ ֆիլմի համաշխարհային պրեմիերան կայացել է այս տարվա հունվարի 26–ին Շվեդիայի Գյոթեբորգ քաղաքում, ժապավենը ներկայացվել է նաև Գերմանիայում, որտեղ տարբեր արձագանքներ է ստացել։
«Շվեդիայում ֆիլմը լավ դիմավորեցին։ Ինչ վերաբերում է Գերմանիային, ապա բացասական արձագանքների պատճառը թուրքական համայնքի վերաբերմունքն էր ֆիլմին, քանի որ «Ռոմանտիկները» ֆիլմում ներկայացված է Հայոց ցեղասպանության խնդիրը»,– ասաց ռեժիսորը։
Պատասխանելով «Նովոստի–Արմենիա» գործակալության հարցին` Ազատյանը նշեց, որ ռեժիսորները ծրագրում են տարվա ընթացքում ներկայացնել ֆիլմն արտասահմանում։
«Ես չեմ սիրում խոսել ծրագրերի մասին, մինչև դրանք իրականություն չդառնան, սակայն ասեմ, որ առջևում դեռ 7-8 միջազգային կինոփառատոն ունենք, և խոսքը միայն Եվրոպայի մասին չէ»,– ասաց նա։
Ռեժիսոր Շողիկ Թադևոսյանն իր հերթին նշեց, որ ֆիլմում նկարահանվել են նաև օտարերկրացի դերասաններ` գերմանացի Դևիդ Ֆրանցրեբը և իռլանդացի Րաֆֆի Էլիոթը։
«Մենք շատ պրոֆեսիոնալ խմբի հետ ենք աշխատել։ Թեև ֆիլմում ներկայացնում ենք Գերմանիայի բացասական կողմը 1915 թվականի հայոց ցեղասպանության հարցում, գերմանացի դերասան Դևիդ Ֆրանցրեբն ամեն ինչ շատ ճիշտ ընկալեց և փայլուն կատարեց իր դերը»,– ասաց նա։
Գլխավոր դերակատար Նարեկ Կտոյանն իր հերթին նշեց, որ իր դերը շատ հետաքրքիր էր և հոգեհարազատ։
«Կարևորը, որ «Ռոմանտիկները» ֆիլմը որակյալ ժապավեն է, որը տարբերվում է հայկական ժամանակակից ինդուստրիայի և շոու բիզնեսի ներկայացրած ցածրորակ արտադրանքից։ Սա լուրջ աշխատանք է, պահանջում է լուրջ ընկալում և մոտ է ժամանակակից երիտասարդության իրողություններին»,– ասաց դերասանը։
Ֆիլմի տևողությունը 92 րոպե է։ Ֆիլմում նկարահանվել ե` Նարեկ Ներսիսյանը, Նարեկ Կտոյանը, Կարեն Խոսրովյանը, Դևիդ, Ֆրանցրեբը, Ռոբերտ Դանիելյանը, Արթուր Խալումյանը, Հակոբ Մանուկյանը, Րաֆֆի Էլիոթը։ «Ռոմանտիկները» բյուջեն կազմել է 210 հազար եվրո։ -0
