Հայկական կինոյի օրեր են բացվում Կրասնոդարում

ԵՐԵՎԱՆ, 22 ապրիլի. /Նովոստի–Արմենիա/. Երիտասարդ ռեժիսոր Նատալյա Բելյաուսկենեյի «Եթե բոլորը» ֆիլմը, որը հաղթել էր «Ոսկե ծիրան» միջազգային ամենամյա կինոփառատոնի անվանակարգերից մեկում, երեքշաբթի Կրասնոդարում կբացի Հայկական կինոյի օրերը, հայտնում է Կրասնոդարի երկրամասի մշակույթի նախարարությունը։

«Բացման օրը փառատոնի հյուրերը նաև հանդիպումներ կունենան հայտնի դուդուկահար Գևորգ Կարապետյանի, հայկական ժողովրդական պարերի ինքնատիպ կատարող Աննա Մոսինյանի և Կուբանի հայ համայնքի ներկայացուցիչների հետ»,– ասվում է հաղորդման մեջ, տեղեկացնում է «ՌԻԱ Նովոստին»։

Հայկական կինոյի օրերի հիմնական ծրագիրը կազմված է «Հայֆիլմ» կինոստուդիայում խորհրդային տարիներին նկարահանած ֆիլմերից։ Հեռուստադիտողին կներկայացվեն հայկական և ռուսական կինոյի աստղ Արմեն Ջիգարխանյանի մասնակցությամբ ֆիլմեր` «Հարսնացուն հյուսիսից», «Եկել են խոհարարական մրցույթի»։

Առանձին էջ էլ նվիրված է համաշխարհային կինեմատոգրաֆի ականավոր վարպետ Սերգեյ Փարաջանովին։ «Ականավոր կինոռեժիսորի, նկարչի անձին է նվիրված ռեժիսոր Սերժ Ավեդիքյանի «Փարաջանով» ֆիլմը»,– պարզաբանել են նախարարությունից։

Հայկական կինոյի օրեր կանցկացվեն Կուբանի մայրաքաղաքում «Եվրոպական կինոյի փառատոն» նախագծի շրջանակում մինչև ապրիլի 30–ը։ Կազմակերպիչն է  Կրասնոդարի երկրամասի մշակույթի նախարարությունը` Հայաստանի մշակույթի նախարարության օժանդակությամբ։ -0-