Հայաստանի պետական երգչախմբի գլխավոր դիրիժոր Հովհաննես Չեքիջյանը դարձել է «Համագործակցության աստղեր» միջպետական մրցանակի դափնեկիր

ԵՐԵՎԱՆ, 18 ապրիլի. /Նովոստի–Արմենիա/. Հայաստանի պետական երգչախմբի գլխավոր դիրիժոր Հովհաննես Չեքիջյանը դարձել է «Համագործակցության աստղեր» միջպետական մրցանակի դափնեկիր` մշակույթի և արվեստի բնագավառում, ուրբաթ «Նովոստի-Արմենիա» գործակալության համար այդ տեղեկատվությունը հաստատեցին ՀՀ մշակույթի նախարարությունից։

«Համագործակցության աստղեր» միջպետական մրցանակի դափնեկիրների մեծարման արարողությունը նախօրեին տեղի է ունեցել Մոսկվայում։ Պարգևատրման` թվով հինգերորդ արարողությունը տեղի է ունեցել Ռուսաստանի Մեծ թատրոնի բեթհովենյան սրահում։

«Համագործակցության աստղեր» միջպետական մրցանակը հիմնադրվել է ԱՊՀ մասնակից պետությունների Հումանիտար համագործակցության խորհրդի և ԱՊՀ մասնակից պետությունների հումանիտար համագործակցության միջպետական հիմնադրամի կողմից 2009թ. մայիսի 21-ին Աստանայում։ Ամեն տարի այն շնորհվում է գիտության և կրթության, մշակույթի և արվեստի բնագավառում, մարդասիրական գործունեության խոշոր ներդրումների և նվաճումների համար, որոնք համապատասխանում են համաշխարհային նվաճումների մակարդակին և նպաստում են Համագործակցության երկրների հումանիտար համագործակցությանը։

Մշակույթի և արվեստի բնագավառի այս տարվա մրցանակակիրներն են` ԽՍՀՄ ժողովրդական արտիստ, երկու թատրոնների` Չեխովի անվան ՄԳԹ և իր սեփական` ժողովրդի կողմից «Տաբակերկա» անունը ստացած թատրոնի ղեկավար Օլեգ Տաբակովը, Հայաստանի պետական երգչախմբի գլխավոր դիրիժոր Հովհաննես Չեքիջյանը և Ադրբեջանի ժողովրդական նկարիչ Օմար Էլդարովը։--0--