ԵՐԵՎԱՆ, 10 ապրիլի. /Նովոստի–Արմենիա/. Իտալացի հայտնի սաքսոֆոնահար Ֆեդերիկո Մոնդելչին ապրիլի 26–ին Երևանում «Անմոռանալի Beatles» խորագրով համերգ կտա, «Նովոստի–Արմենիա» գործակալությանը հայտնեցին Պետական կամերային նվագախմբի մամուլի ծառայությունից։
Համերգը կանցնի Արամ Խաչատրյանի անվան համերգասրահում, գեղարվեստական ղեկավար և գլխավոր դիրիժոր Վահան Մարտիրոսյանի գլխավորած Պետական կամերային նվագախմբի ուղեկցությամբ։
«Կկատարվի Ռոբերտո Գրանատի գործիքավորմամբ «Անմոռանալի Beatles» սաքսոֆոնի և լարայինների սյուիտը, որն իրենից ներկայացնում է լիվերպուլյան քառյակի ստեղծագործությունների պոպուրի»,– ասաց գործակալության զրուցակիցը։
Ըստ նրա, սյուիտի հիմքում ընկել են Beatles–ի այնպիսի հայտնի երգեր, ինչպես Yesterday, Michelle, Help, A Hard Day's Night, Let it Be, Lady Get Back, Hey Jude, Eleanor Rigby և Yellow Submarine։
Կկատարվի նաև Գերշվինի, Բերնսթայնի, Մոնկի և հայտնի այլ կոմպոզիտորների ստեղծագործությունների մոտիվներով «Կեսգիշերին» սաքսոֆոնի և լարայինների սյուիտը Ստեֆանո Նաննիի մշակմամբ։ Եվ վերջում երաժիշտները կկատարեն Աստոր Պիացոլայի Revirado և Meditango երաժշտական կոմպոզիացիաները։
Ֆեդերիկո Մոնդելչին ժամանակակից առաջատար սաքսոֆոնահարներից է, բազմիցս ներկայացրել է Իտալիան սաքսաֆոնահարների միջազգային փառատոներին Գերմանիայում, Իսպանիայում, Ճապոնիայում և ԱՄՆ–ում։ Իտալիայում հանդես է եկել որպես մենակատար հիմնական նվագախմբերի հետ` ներառյալ Ս.Օզավայի ղեկավարած Լա Սկալա ֆիլհարմոնիկ նվագախումբը (Միլան)։
Մոնդելչին հյուրախաղերով լինում է Եվրոպայի երկրներում և ԱՄՆ–ում, մեծ հաջողությամբ կատարելով Պիացոլայի տանգոյի սեփական գործիքավորումները։ Հաճախ ելույթ է ունենում Կ.Օրբելյանի գլխավորած Ռուսաստանի պետական ակադեմիական կամերային նվագախմբի հետ։ 1990 թվականից հանդես է գալիս նաև որպես դիրիժոր։ Ժամանակակից երաժշտության կատարման ակտիվ ջատագով և գործիքային տեխնիկայի բնագավառի նորարար։ Բազմաթիվ կոմպոզիցիաներ են նվիրվել նրան և հետագայում կատարվել են հայտնի համերգային բեմերում։ -0-
