ԵՐԵՎԱՆ, 10 ապրիլի. /Նովոստի–Արմենիա/. Հայաստանը պետք է իսկապես հպարտանա Պետական ֆիլհարմոնիկ նվագախմբի բարձր պրոֆեսիոնալիզմով, կարծում է աշխարհահռչակ գերմանացի դաշնակահար և դիրիժոր Յուստուս Ֆրանտցը։
Ֆրանտցը որպես Հայաստանի պետական ֆիլհարմոնիկ նվագախմբի խմբավար է հանդես գալու Երևանի Ա.Խաչատրյանի անվան համերգասրահում ապրիլի 11–ին կայանալիք համերգում, որում որպես հրավիրված մենակատար հանդես կգա ֆրանսիացի դաշնակահար Տրիստան Պֆաֆը։ Երեկոյի ընթացքում կհնչեն Բրամսի և Գրիգի ստեղծագործությունները։
«Ես եղել եմ աշխարհի բազմաթիվ քաղաքներում և աշխատել եմ տարբեր նվագախմբերի հետ, և ամեն տեղ չէ, երբ կոլեկտիվներն այսքան բարձր մակարդակի վրա են, ինչպես Հայաստանի պետական ֆիլհարմոնիկ նվագախումբը։ Հայ երաժիշտների հետ թեթև է աշխատելը, նրանք չափազանց արագ են հասկանում, թե ինչ է պետք դիրիժորին»,– հինգշաբթի հրավիրված ասուլիսի ժամանակ ասաց մաեստրոն։
Ըստ նրա, նախքան նվագախմբի հետ ծանոթանալը երաժիշտը համատեղ աշխատանքից լուրջ ակնկալիքներ չուներ։
«Հայաստանում առաջին անգամ եմ ելույթ ունենում և լսել եմ, որ բազմաթիվ երաժիշտներ լքել են նվագախումբը, ու այդ պատճառով առանձնապես համատեղ աշխատանքից ակնկալիքներ չունեի, սակայն հիմա, երբ մենք փորձ անցկացրեցինք, ես բառացիորեն հիացած եմ ձեր երաժիշտներով»,– ավելացրեց Ֆրանտցը։
Մաեստրոյի խոսքով` թեև դա իր առաջին այցն է Հայաստան, նա հեռակա կարգով շատ սիրում է հայ ժողովրդին և Հայաստանը։
«1988 թվականի Սպիտակի ավերիչ երկրաշարժից հետո ես համերգաշար նախաձեռնեցի Գերմանիայում, և ավելի քան 100 հազար գերմանական մարկի հասույթը փոխամցվեց Հայաստանին»,– նշեց երաժիշտը։
Ֆրանտցը նաև պարզաբանեց, որ Հայաստանի նկատմամբ սերն առաջացել է հայկական երաժշտության, և մասնավորապես, Գերմանիայում հայ աշխարհահռչակ կոմպոզիտոր Արամ Խաչատրյանի հետ ծանոթությունից հետո։
«Ես ոչ միայն տպավորված և հիացած եմ հենց Խաչատրյանով, այլ նաև շատ եմ սիրում նրա ստեղծագործությունները, հատկապես Նվագախմբի և դաշնամուրի համար կոնցերտը և «Գայանե» բալետը»,– ասաց Ֆրանտցը` պատասխանելով «Նովոստի–Արմենիա» գործակալության հարցին։
Դաշնակահար Տրիստան Պֆաֆն իր հերթին նշեց, որ ծանոթ է Արամ Խաչատրյանի և Առնո Բաբաջանյանի երաժշտությանը և հիացած է նրանց ստեղծագործությամբ։
«Ինձ նույնպես հաճելի է համագործակցել հայկական նվագախմբի հետ, քանի որ մի քանի ժամ է, որ ծանոթ ենք, բայց արդեն հեշտությամբ հաջողվում է աշխատել հայ երաժիշտների հետ»,– նշեց նա։
«Նովոստի–Արմենիա» գործակալությունն առաջիկա համերգի տեղեկատվական հովանավորն է։
Յուստուս Ֆրանտցի երաժշտական կարիերան սկսվել է 1967 թվականին, երբ նա հաղթել է գերմանական հայտնի հեռուստաալիքի միջազգային երաժշտական մրցույթում։ 1986 թվականին Ֆրանտցը հիմնել է Shleswig-Holstein երաժշտական փառատոնը, որը ղեկավարել է ինը տարիների ընթացքում` այն բարձրացնելով մինչև աշխարհի առաջնակարգ փառատոների մակարդակի։ Յու. Ֆրանտցն արժանացել է մի քանի հեղինակավոր հեռուստամրցանակների հեռուստատեսային հաջող ծրագրերի ստեղծման համար, որոնցից հայտնի է դարձել «Ուշադրություն` դասական երաժշտություն է» հաղորդում է։ 1989 թվականից Յուստուս Ֆրանտցը ՄԱԿ–ում փախստականների հարցերոց հանձնախմբի արտակարգ դեսպան է, նույն տարում պարգևատրվել է Խաչով Գերմանիայի Դաշնային Հանրապետության առջև ունեցած վաստակի համար։
Յուստուս Ֆրանտցը Ազգերի Ֆիլհարմոնիայի գլխավոր դիրիժորն է և մշտական հիմքերով համագործակցում է այնպիսի հայտնի նվագախմբերի հետ, ինչպես Մարիինյան թատրոնի նվագախումբը, Մոսկվայի սիմֆոնիկ նվագախումբը, Չինաստանի ֆիլհարմոնիկ նվագախումը, Դուրբանի ֆիլհարմոնիկ նվագախումբը, Վրաստանի կամերային նվագախումբը, Վարշավայի սիմֆոնիկ նվագախումբը և մի շարք այլ կոլեկտիվներ։ -0-
