ԵՐԵՎԱՆ, 9 ապրիլի. /Նովոստի–Արմենիա/. 2006թ.–ի մանկական «Եվրատեսիլի» հաղթողներ Անաստասիա և Մարիա Տոլմաչևաները, ովքեր այս տարի կներկայացնեն Ռուսաստանը մայիսին Կոպենհագենում կայանալիք «Եվրատեսիլին», ցանկանում են կրկնել իրենց հաջողությունն ու զբաղեցնել առաջին տեղը, ՌԻԱ Նովոստիին է ասել «Ռոսիա 1» հեռուստաալիքի մամուլի ծառայության ներկայացուցիչ Մաքսիմ Կրանինը։
«Ռոսիա 1» հեռուստաալիքը, որն այս տարի Ռուսաստանի տարածքում մրցույթի հեռարձակողն է, ընտրել է Տոլմաչևա քույրերին` առաջին անգամ հրաժարվելով ազգային ընտրությունից, ինչպես ավելի վաղ բազմաթիվ անգամ արել է Առաջին ալիքը (երկու ալիքները հերթով հեռարձակում են մրցույթն ամեն տարի)։ Աղջիկները հանդես կգան «Shine» երգով։
Պատասխանելով հաղթանակի հնարավորությունների մասին հարցին` Կրանինն ասել է. «Առաջին տեղը։ Մեր աղջիկները նույնիսկ ասել են, որ ցանկանում են կրկնել 2006 թ.–ին մանկական «Եվրատեսիլում» գրանցած արդյունքը»։ Նա ավելացրել է, որ ապրիլի 27–ին ռուսական պատվիրակությունը կմեկնի Կոպենհագեն, իսկ արդեն 28–ին նախատեսված է առաջին փորձը։ Տոլմաչևա քույրերի ելույթի մանրամասները Կրանինը չներկայացրեց, հաղորդում է ՌԻԱ Նովոստին։
Չնայած իրենց տարիքին, 17–ամյա քույրերը երաժշտական մեծ փորձ ունեն։ Դեռ վաղ հասակից աղջիկները այցելել են Կուրսկում գտնվող «Սվերչոկ» երաժշտական ստուդիան, այնուհետև «Ջեմ» երաժշտական թատրոն։ Տոլմաչևաների առաջին ձեռքբերումը եղել է «Ոսկե նավակ», «Նևսկի աստղիկներ», «Երիտասարդների աստղաբույլ» երաժշտական մրցույթներում տարած հաղթանակները։ Մանկական «Եվրատեսիլ»–ում տարած հաղթանակից հետո (որտեղ նրանք կատարեցին «Գարնանային ջազ» ստեղծագործությունը), քույրերը ձայնագրեցին իրենց առաջին ալբոմը` «Половинки», առաջին անգամ հանդես եկան որպես հեռուստահաղորդավարներ միանգամից մի քանի հայտնի ծրագրերում, նկարահանվեցին «Ծուռ հայելիների թագավորություն» հեռուստատեսային մյուզիքլում, որտեղ երգեցին Ալլա Պուգաչովայի հետ։–0–
