Հայաստանի Օպերայի և բալետի ակադեմիական թատրոնի տնօրենի թափուր պաշտոնի մրցույթին մասնակցում է 7 թեկնածու

ԵՐԵՎԱՆ, 4 ապրիլի. /Նովոստի–Արմենիա/. Հայաստանի Ալ. Սպենդիարյանի անվան Օպերայի և բալետի ակադեմիական թատրոնի տնօրենի թափուր պաշտոնի մրցույթին մասնակցում է 7 թեկնածու, հաղորդում է  մշակույթի նախարարության մամուլի ծառայությունը։

Ուրբաթ նախարարությունում անցկացվելիք մրցույթին մասնակցում են Երվանդ Երկանյանը, Արման Ծատուրյանը, Անդրանիկ Արզումանյանը, Տիգրան Դավթյանը, Բարսեղ Թումանյանը, Արթուր Շահնազարյանը, Գագիկ Մանասյանը:

Օպերայի և բալետի ազգային ակադեմիական թատրոնի տնօրենի թափուր պաշտոնը զբաղեցնելու համար մրցույթի դիմումների ընդունման վերջնաժամկետն էր ս. թ. մարտի 15-ը: ՊՈԱԿ-ի տնօրենի թափուր պաշտոն զբաղեցնելու մրցույթին մասնակցելու համար ներկայացվել էր 9 դիմում: Մրցույթին չեն ներկայացել 2 թեկնածու՝ Գեղամ Մելիքսեթյան, Ռուբեն Տերտերյան:
Ներկա պահին Օպերայի և բալետի ազգային ակադեմիական թատրոնի տնօրենի պաշտոնը ժամանակավոր կատարում է փոխտնօրեն Հրաչ Գրիգորյանը։

Նախկին տնօրեն Կամո Հավհաննիսյանը զբաղեցրած պաշտոնից ազատվել է իր դիմումի համաձայն` այլ պաշտոնի անցնելու կապակցությամբ։ Նա նշանակվել է մշակույթի նախարարի խորհրդական։

Կամո Հավհաննիսյանը Օպերայի և բալետի ակադեմիական թատրոնի տնօրենի պաշտոնը զբաղեցնում էր 1999 թ.-ից -0-