Հայտնի գերմանացի դաշնակահար Անդրեաս Ֆրյոլիխը Երևանում ելույթ կունենա Հայաստանի պետական ֆիլհարմոնիկ նվագախմբի հետ

ԵՐԵՎԱՆ, 1 ապրիլի. /Նովոստի–Արմենիա/. Հայտնի գերմանացի դաշնակահար Անդրեաս Ֆյորլիխը ապրիլի 4–ին ելույթ կունենա Երևանում Հայաստանի պետական ֆիլհարմոնիկ նվագախմբի նվագակցությամբ, հաղորդում է նվագախմբի մամուլի ծառայությունը։

Երաժիշտը կկատարի Բեթհովենի Եռակի կոնցերտը։ Որպես մենակատարներ ելույթ կունենան նաև թավջութակահար Ալեքսանդր Չաուշյանն ու ջութակահարուհի Անուշ Նիկողոսյանը։
Հայաստանի պետական ֆիլհարմոնիկ նվագախումբը Ֆրյոլիխի հետ վերջերս ձայնագրել է Մոցարտի ստեղծագործություններից OEHMS Classics-ի համար:

Անդրեաս Ֆյորլիխը հայտնի կամերային երաժիշտ է, հանդես է գալիս Բեռլինի Մենդելսոնի անվան տրիոյում ջութակահար Ուտա Կուներտի և հայ հանդիսատեսին արդեն հայտնի թավջութակահար Ռոման Յաֆֆեի հետ։

Ֆրյոլիխը սովորել է Վիտալի Մորգուլիսի և Պավել Գիլիլովի հետ միասին։ Նա բազմաթիվ մրցանակների դափնեկիր է։ Ելույթ է ունենում Եվրոպայի, Հյուսիսային Ամերիկայի, Ասիայի և Ավստրալիայի լավագույն բեմերում։–0–