Հայտնի մուլտիպլիկատոր Դավիթ Սահակյանցը նոր մուլտֆիլմ է նկարահանում Վրթանես Փափազյանի «Կլոր աստվածներ» հեքիաթի մոտիվներով

ԵՐԵՎԱՆ, 28 մարտի. /Նովոստի–Արմենիա/. Հայտնի հայ ռեժիսոր մուլտիպլիկատոր, «Ռոբերտ Սահակյանց փրոդաքշն» ստուդիայի ղեկավար Դավիթ Սահակյանցը նոր մուլտֆիլմ է նկարահանում գրող Վրթանես Փափազյանի «Կլոր աստվածներ» հեքիաթի մոտիվներով։

«Հունիսից մտադիր եմ սկսել նոր տասը րոպե տևողությամբ մուլտֆիլմի նկարահանումը, որի հիմքում ընկած կլինի Վրթանես Փափազյանի հեքիաթը։ Կարծում եմ, որ այս տարվա վերջին նոր մուլտֆիլմի աշխատանքը կավարտվի», – տեղեկացրեց նա «Նովոստի–Արմենիա» գործակալությանը։ Նա նաև ավելացրեց, որ ֆիլմը կնկարահանվի «Ռոբերտ Սահակյանց փրոդաքշն» ստուդիայում։

«Կլոր աստվածներ» հեքիաթն այլաբանություն է, որը պատմում է մարդկանց նկատմամբ ոսկե հորթի իշխանության մասին։

Սահակյանցը նաև նշեց, որ մուլտֆիլմում սյուժետային մասը կպահպանվի, սակայն նյութի ներկայացումը փոքր–ինչ կտարբերվի։

Ռեժիսորը նաև տեղեկացրեց, որ կարճամետրաժ մուլտֆիլմի աշխատանքը կընթանա «Անահիտ» լիամետրաժ անիմացիոն ֆիլմին զուգահեռ։

Հայտնի հայ գրող, արձակագիր, դրամատուրգ Վրթանես Փափազյանը (1864–1920) իր գործունեության ընթացքում բազմաթիվ անգամ դիմել է ոչ միայն հայկական, այլև մերձարևելյան տարածաշրջանի բանահյուսությանը։ Նրա ստեղծագործության մեջ մեջ դեր է զբաղեցնում մի ժանր, որը գրողն անվանում է «զրույց»։

Նա ստեղծել է մոտ 50 հեքիաթ, որոնց թվում են «Փայտե սուրը», «Ստամոքսի համար» «Առվակը», «Սոխակ» և «Ինչում էր ուժը» հեքիաթները։–0–