ԵՐԵՎԱՆ, 20 մարտի. /Նովոստի–Արմենիա/. Եվրատեսիլ-2014–ի լավագույն կատարողների բուքմեքերական եռյակի առաջատարը Հայաստանի ներկայացուցիչ Արամ MP3–ն է, ով կկատարի «Not Alone» երգը։
Այսպես, Williamhill հայտնի բուքմեքերական գրասենյակն ընդունում է հայ ներկայացուցչի հաղթանակը 2.10 գործակցով։ Երկրորդ և երրորդ տեղում են շվեդ երգչուհի Սաննա Նիլսենը «Undo» երգով և նորվեգացի երգիչ Կառլ Էսպենը «Silent Storm» երգով, որոնց գործակիցը հավասար է 6.5-ի։
«bwin» միջազգային բուքմեքերական գրասենյակի փորձագետները նույնպես ակնհայտ ֆավորիտ են համարում Արամ MP3 (2,25)։ Երկրորդ տեղը, փորձագետների կարծիքով, կզբաղեցնի շվեդուհին MP3 (7), երրորդը` նորվեգացին MP3 (9)։
Հայ բուքմեքերները նույնպես իրենց ներկայացուցչին ակնհայտ ֆավորիտ են համարում։ Այսպես, Արամ MP3–ի հաղթանակը գնահատվել է 2,2։ Շվեդիայի ներկայացուցչինը` 5.8, իսկ նորվեգացու հաղթանակը` 6.5։
«Եվրատեսիլ-2014» մրցույթը կկայանա Կոպենհագենում այս տարվա մայիսին։ Եվրաշոուի բոլոր կիսաեզրափակիչները և եզրափակիչը կանցնեն Refshaleoen–ի B&W Hallerne բեմում։ Մրցույթի կիսաեզրափակիչները կկայանան մայիսի 6—ին և 8–ին, իսկ եզրափակիչ շոուն` մայիսի 10–ին։ Մրցույթն անցնում է «Միացիր մեզ» (Join Us) կարգախոսով` կոչ անելով բոլոր երկրպագուներին միանալ սիրած եվրոպական մրցույթին։
Կազմակերպիչների նախաձեռնությամբ այս տարի ցանկացած մարդ կարող է հայտնվել «Եվրատեսիլի» մրցույթում, եթե կատարի 2013 թվականի հաղթող դանիացի երգչուհի Էմիլի դը Ֆորեստի «Only Teardrops» երգը կամ պարի դրա տակ` տեսագրելով այն JoinUs.dk կայքում։ Լավագույն կատարումները կցուցադրվեն մեծ էկրանին մրցույթի ընթացքում, իսկ պարի լավագույն կատարողները բեմում ելույթ ունենալու հնարավորություն կստանան։
2014 թվականին մրցույթին կմասնակցի 36 երկիր։ Առաջին կիսաեզրափակչում, որը կկայանա մայիսի 6–ին, ելույթ կունենան 16 երկրներ, իսկ երկրորդ կիսաեզրափակչին կմասնակցեն 15 երկրներ։
Հայ երգիչ և շոումեն Արամ MP3–ը (Արամ Սարգսյան), ով ներկայացնում է Հայաստանը Եվրատեսիլ-2014 երգի միջազգային մրցույթում, հանդես կգա առաջին կիսաեզրափակչում մայիսի 6–ին։ Հայաստանի հետ միասին առաջին կիսաեզրափակչում ելույթ կունենան Ռուսաստանը, Շվեդիան, Ալբանիան, Իսլանդիան, Լատվիան, Ադրբեջանը և Էստոնիան, իսկ երկրորդ մասին կմասնակցեն Բելգիան, Հունգարիան, Մոլդովան, Չեռնոգորիան, Սան–Մարինոն, Պորտուգալիան, Ուկրաինան և Նիդեռլանդները։
Երկու կիսաեզրափակիչների տասական մասնակիցներ եզրափակչում կպայքարեն «մեծ հնգյակի» երկրների ներկայացուցիչների հետ (Իսպանիա, Գերմանիա, Իտալիա, Մեծ Բրիտանիա, Ֆրանսիա), ինչպես նաև ընդունող երկրի` Դանիայի ներկայացուցչի հետ։
Կոպենհագենն արդեն երկու անգամ ընդունել է մրցույթը` 1964 և 200 թթ.–ին, իսկ 2005 թ.–ին այնտեղ անցկացվել են «Եվրատեսիլի» 50–ամյակին նվիրված տոնակատարությունները։
Հայաստանը մասնակցում է «Եվրատեսիլ» մրցույթին` սկսած 2006 թվականից։ 2008 թվականին լավագույն արդյունքը ցույց տվեց Սիրուշոն` զբաղեցնելով չորրորդ տեղը։
2013թ.–ին Հայաստանը ներկայացրեց Dorians ռոք խումբը, որը Շվեդիայի Մալմո քաղաքում տեղի ունեցած «Եվրատեսիլ–2013» երգի մրցույթի ժամանակ «Lonely Planet» երգով զբաղեցրեց 18–րդ տեղը։–0-
