ԵՐԵՎԱՆ, 19 մարտի. /Նովոստի–Արմենիա/. «ARMENIA MUSIC AWARDS» իններորդ` LEGENDS 2014 մրցանակաբաշխությունը կկայանա ապրիլի 6–ին Մոսկվայի Կրեմլի պետական պալատում, հայտնում է մրցանակաբաշխության կազմակերպիչ «Արմենիա փրոդաքշն» պրոդյուսեարական կենտրոնի մամուլի ծառայությունը։
«2014 թ.–ին «Արմենիա փրոդաքշնը» որոշել է մրցանակաբաշխությունը կազմակերպել «LEGENDS» հատուկ ձևաչափում։ 2014 թ.–ի բոլոր թեկնածուները անգնահատելի ներդրում են կատարել հայկական երաժշտական մշակույթի զարգացման, ինչպես նաև Հայաստանի սահմաններից դուրս այն տարածելու գործում», – նշվում է հաղորդագրության մեջ։
Ըստ ավանդույթի` մրցանակաբաշխության արարողությունը տեղի է ունենում դասական ձևաչափով, որի շրջանակներում ներկայացված է 21 անվանակարգ (Տարվա հիթ, Տարվա երգիչ, Տարվա երգչուհի, Տարվա ալբոմ և այլն)։
Պատվավոր հյուրերը հանձնում են անվանական ոսկեջրած արձանիկ, որը ստեղծվել է հայտնի քանդակագործի կողմից մոլորակի և ծառի տեսքով, որը աշխարհի 136 երկրներում հայկական համայնքների միավորում է խորհրդանշում։
«Armenia» Music Awards LEGENDS 2014» հանդիսավոր արարողության ընթացքում կհրապարակվի 14 անուն, ովքեր արժանացել է «Լեգենդ» մրցանակի։
Միջոցառմանն իրենց մասնակցությունը հաստատել են Միշել Լեգրանը, Շառլ Ազնավուրը, Ջիվան Գասպարյանը, Իրինա Ալեգրովան, Ստաս Նամինը, Ռուբեն Մաթևոսյանը, Օֆելյա Համբարձումյանը, Ռոզի Արմենը, Դավիթ Թուխմանովը և այլ հայտնի երաժիշտներ։
Որպես 2014 թ.–ի պատվավոր թեկնածուներ` հրավիրված են նաև Արթուր Գրիգորյանը, Արթուր Մեսչյանը, Ջիվան Գասպարյանը, Կոնստանտին Օրբելյանը, Մալխասը, Հովհաննես Չեքիջյանը, Օֆելյա Համբարձումյանը, Ռոբերտ Ամիրխանյանը, Ռուբեն Հախվերդյանը, Սերժ Թանգյանը, Տաթևիկ Հովհաննիսյանը, Տիգրան Մանսուրյանը։
Համերգային ծրագրին կմասնակցեն նաև Արամ Mp 3–ն, Անդրեն, Արման Հովհաննիսյանը, Ջիվան Գասպարյան կրտսերը, Արմեն Բաբախանյանը, Ինգա և Անուշ Արշակյանները, Թաթա Սիմոնյանը, Մուրադ Մալխասյանը, Սևակ Ամրոյանը, Rockin' Raffi Arto-ն։
«Ի հիշատակ լեգենդների»` հատուկ մրցանակի կարժանանան Ավետ Տերտերյանը, Ալեքսեյ Հեքիմյանը, Արամ Խաչատրյանը, Առնո Բաբաջանյանը, Գոհար Գասպարյանը, Լուսինե Զաքարյանը, Միխայիլ Թարիվերդիևը, Հովհաննես Բադալյանը, Էլվինա Մակարյանը։
«ARMENIA MUSIC AWARDS»-ը Հայաստանի և սփյուռքի երաժշտական արվեստի պատմության կարևոր իրադարձություններից է։ Յոթ տարվա ընթացքում արարողության մասնակիցներ, հատուկ հյուրեր և մրցանակակիրներ են դարձել Ռուսաստանի, Հայաստանի և աշխարհի այլ երկրների մշակույթի, արվեստի և շոու-բիզնեսի հայտնի գործիչներ:
Հանդիսավոր արարողությանը ամենամյա մրցանակներ են հանձնվում Հայաստանի, Ռուսաստանի, ԱՄՆ-ի, Եվրոպայի և աշխարհի այլ երկրների դերասաններին, երաժիշտներին, մեդիա-ներկայացուցիչներին՝ մշակութային կյանքում ունեցած նրանց ավանդի և սեփական ձեռքբերումների համար: -0-
