Ջութակահար Նիկոլայ Մադոյանը սպասում է իր ռեկորդի հաստատմանը Գինեսի ռեկորդների գրքի կոմիտեի կողմից

ԵՐԵՎԱՆ, 21 փետրվարի. /Նովոստի–Արմենիա/. Հայտնի ջութակահար, Հայաստանի վաստակավոր արտիստ Նիկոլայ Մադոյանը սպասում է իր ռեկորդի հաստատմանը Գինեսի ռեկորդների գրքի գրանցման կոմիտեի կողմից։

Մադոյանը Օպերայի և բալետի ազգային ակադեմիական թատրոնի սիմֆոնիկ նվագախմբի նվագակցությամբ փետրվարի 20–ին Երևանում մեկ երեկոյի ընթացքում կատարել է Պագանինիի ջութակի վեց կոնցերտները։ Երեկոն դարձել է աշխարհում հազվագյուտ երաժշտական իրադարձություններից մեկը։

«Համերգին ներկա է եղել հատուկ հանձնաժողով` Հայաստանի կոմպոզիտորների միության նախագահ Արամ Սաթյանի գլխավորությամբ, որը հաստատել է ռեկորդի գրանցման պահանջներին համապատասխանությունը», – «Նովոստի–Արմենիա» գործակալությանն ասել է համերգային ծրագրի համակարգող Սուսաննա Զորանյանը։

Նա տեղեկացրել է, որ Գինեսի ռեկորդների գրքի գրանցման հայտն արդեն ներկայացվել է, սակայն այն պետք է քննարկվի և հաստատվի գրանցման կոմիտեի կողմից։–0–