ԵՐԵՎԱՆ, 17 փետրվարի. /Նովոստի–Արմենիա/. Լարս ֆոն Թրիերի ֆիլմերը «պոռնոգրաֆիա» բնորոշելն անհեթեթություն է, դա վկայում է կինոարվեստի հարցերում անիրազեկության մասին, կարծում է կինոգետ Զավեն Բոյաջյանը։
«Այս ֆիլմը պոռնոգրաֆիա չէ, այն արթհաուսի, բարձրակարգ կինեմատոգրաֆի նմուշ», – երկուշաբթի հրավիրված ասուլիսի ժամանակ ասաց Բոյաջյանը։
Նրա խոսքով` պոռնոգրաֆիայի հետ կապված խոսակցություններն առաջացան ռուսական բուլվարային մամուլում լրագրողների հրապարակումներից հետո, դրանք օգտագործեց «Սինեմա Սթար» երևանյան կինոթատրոնի (որտեղ պետք է ցուցադրվեր ֆիլմը) մարկետինգի բաժինը ֆիլմի շուրջ իրարանցում ստեղծելու համար, հենց դա էլ տեղի ունեցավ, քանի որ ոչ ոք հարց չտվեց` թե ով է Լարս ֆոն Թրիերը, ինչ է այն նկարահանում, ինչ ուղի է անցել։
Դանիացի ռեժիսոր Լարս ֆոն Թրիերի «Նիմֆոմանուհի» ֆիլմի առաջին մասին երևանյան պրեմիերան պետք է տեղի ունենար 2014 թ.–ի փետրվարի 13–ին «Սինեմա Սթար» կինոթատրոնում` եվրոպական այլ երկրներում ֆիլմի պրեմիերային զուգահեռ, սակայն արդեն փետրվարի 12–ին կինոթատրոնի ղեկավարությունը հրաժարվեց ֆիլմի ցուցադրությունից` բացատրելով դա մի շարք քաղաքացիների և հասարակական խմբերի բազմաթիվ առարկություններով, որոնք կասկած են հայտնել Հայաստանում մեծ էկրանով ֆիլմի ցուցադրության նպատակահարմարության վերաբերյալ։
Ֆիլմի ցուցադրության կողմնակիցները խնդրագիր կազմեցին` պահանջելով ցուցադրել ֆիլմը մեծ էկրանին։
«Այն, ինչ դուք պոռնոգրաֆիա եք անվանում, սոֆթ կամ հարդ էրոտիկա է կամ սեքս, որը Լարս ֆոն Թրիերն օգտագործում է իր ֆիլմերում 1990–ականներից (օրինակ` «Ճեղքելով ալիքները» կամ «Ապուշները» ֆիլմերը)։ Եթե դուք դիտել եք «Ապուշները», ապա ռեժիսորն այդ ֆիլմում նկարահանվելու համար անգամ հրավիրել է պոռնոդերասանների, ովքեր դրվագներից մեկում նկարահանվել են պոռնոտեսարանում։ Սակայն դա Լարս ֆոն Թրիերին պոռնոգրաֆ չդարձրեց, և այն, ինչ մենք հիմա քննարկում ենք, պարզապես ծիծաղելի է», – նշեց նա։
Նա ընդգծեց, որ պոռնոգրաֆիան հատուկ ժանր է, որն ունի իր լսարանն ու նպատակները, և անընդունելի է խառնել այն գեղարվեստական կինեմատոգրաֆի հետ։ Իսկ պոռնոգրաֆիայով, նրա խոսքերով, հայ հասարակությանը չես զարմացնի, հատկապես հասանելի ինտերնետի դարաշրջանում, երբ անկեղծ կոնտենտը կարելի է դիտել առանց սահմանափակումների։
Խոսելով «Սինեմա Սթար» կինոթատրոնի ղեկավարության հայտարարությունների մասին, ըստ որոնց` հայ հասարակությունը պատրաստ չէ նման ֆիլմերի, ապա նա ընդգծեց, որ անելով նման հայտարարություններ` հարկավոր է պարտադիր հաշվի առնել, որ հասարակությունը բազմաշերտ է և բաղկացած է հանդիսատեսից, որը ներկայացնում է տարբեր սոցիալական խմբեր։ Իսկ արթհաուսային կինոն, նրա խոսքով, հազվադեպ է հավաքում մեծ և լիքը դահլիճներ։
«Կինոթատրոնը պետք է ունենա ֆիլմերի ցուցադրության հստակ մշակված հայեցակարգ։ Արթհաուսային, փառատոնային, էլիտար ֆիլմերը պետք է ցուցադրվեն այն դահլիճներում, ուր կմտնեն այն մարդիկ, ովքեր հետաքրքրված են նման ֆիլմերի ցուցադրությամբ, այլ ոչ թե նրանք, ովքեր Լարս ֆոն Թրիերին դարձնում են պոռնոգրաֆ, իսկ նրա անունը գցում են տգետ մասսաների բերանը», – նշեց կինոգետը։–0–
