«Նիմֆոմանուհի» սկանդալային ֆիլմի երևանյան պրեմիերան տեղի չի ունենա հասարակական դժգոհության պատճառով. «Սինեմա Սթար»

ԵՐԵՎԱՆ, 12 փետրվարի. /Նովոստի-Արմենիա/. Դանիացի հայտնի ռեժիսոր Լարս ֆոն Թրիերի` մեծ աղմուկ բարձրացրած «Նիմֆոմանուհի» (Nymphomaniac) ֆիլմի առաջին մասի երևանյան պրեմիերան տեղի չի ունենա հասարակական դժգոհության պատճառով։

Ի պատասխան ուղարկված հարցման` այս մասին «Նովոստի–Արմենիա» գործակալությանը չորեքշաբթի տեղեկացրել են «Սինեմա Սթար» կինոթատրոնի մարկետինգի բաժնից։

Ավելի վաղ «Սինեմա Սթար» կինոթատրոնից «Նովոստի–Արմենիա» գործակալությանը տեղեկացրել էին, որ ֆիլմի պրեմիերան նախատեսված է փետրվարի 13–ին։

««Սինեմա Սթար Դալմա Գարդեն» կինոթատրոնն այսօր որոշում է ընդունել, որ հրաժարվել է նախապես հայտարարված Լարս ֆոն Թրիերի «Նիմֆոմանուհի» ֆիլմի ցուցադրությունից, որի պրեմիերան նախանշված էր փետրվարի 13-ին` համաշխարհային ցուցադրությանը զուգընթաց: Որոշման համար հիմք են հանդիսացել մի շարք քաղաքացիների և հասարակական խմբերի բազմաթիվ առարկությունները, որոնք կասկած են հայտնել Հայաստանում մեծ էկրանով ֆիլմի ցուցադրության նպատակահարմարության վերաբերյալ», – տեղեկացրել են կինոթատրոնից։

Մամուլի հաղորդագրության մեջ նշվում է, որ «Նիմֆոմանուհի» ֆիլմի պրեմիերայի նախօրոք ամրագրված տոմսերի մասին լրացուցիչ տեղեկություն կարելի է ստանալ կինոթատրոնի տոմսարկղերում։

Հարկ է նշել, որ ֆիլմի ցուցադրության վերաբերյալ չորեքշաբթի առավոտյան «Սինեմա Սթարին» ուղղված «Նովոստի–Արմենիա» գործակալության հարցման պատասխանը գործակալություն ստացվել է միայն ժամը 13։00–ին, այն դեպքում, երբ այդ տեղեկատվությունը որոշ ԶԼՄ–ների կայքերում հայտնվել է շատ ավելի շուտ։

Ֆիլմի գլխավոր դերակատարներն են Շառլոտա Գենսբուրը, Ստելան Սկարսգարդը, Շայա Լաբաֆը, ով հայտնի է «Պարանոյա» և «Տրանսֆորմերները» ֆիլմերում խաղացած դերերով։

Ֆիլմում ծեր Սելիգմանը փողոցի մութ անկյունում ծեծված կնոջ է գտնում և տանում իր տուն։ Երբ կինն ուշքի է գալիս, սկսում է պատմել իր սեքսուալ կյանքի պատմությունը։

«Սինեմա Սթարը» կինոթատրոնների ռուսական ցանց է, որոնք առկա են Ռուսաստանի և Հայաստանի ավելի քան 15 քաղաքներում։ «Սինեմա Սթարը» զբաղեցնում և երկար տարիներ պահում է պատվավոր տեղը Ռուսաստանի կինովարձույթի խոշորագույն օպերատորների յոթնյակում։ Հայաստանում կինոթատրոնը գործում է 2013 թ.–ից։–0–